গোলাঘাট , 30 এপ্ৰিল : গোলাঘাটৰ নুমলীগড়ত নেৰা-নেপেৰা বৰষুণৰ ফলত কৃত্ৰিম বান পানীৰ সৃষ্টি হৈছে ৷ কৃত্ৰিম বানৰ বাবে পানীৰ তলত বুৰ গৈছে 37 নং ৰাষ্ট্ৰীয় ঘাইপথ ৷
গোলাঘাটৰ নুমলীগড়ত প্ৰচণ্ড বৰষুণৰ ফলত কৃত্ৰিম বান
নুমলীগড় চাহ বাগিচাৰ পৰা হিলদল ভাঙি বৈ অহা পানীৰ সোঁতে নুমলীগড়ৰ বহু লোকৰ ঘৰ বাৰী বুৰাই পেলাইছে ৷ এই বাবে নিশাৰে পৰা এই পৰ্যন্ত ৰাইজৰ নাজল-নাথল অৱস্থা হৈছে ৷ জানিব পৰা মতে নুমলীগড় তিনিআলি, বিহৰা, পাইপলাইন আদি অঞ্চলৰ বহু লোকৰ ঘৰৰ ভিতৰত পানী সোমাইছে ৷ ইফালে পানীৰ তলত বুৰ গৈছে 37 নং ৰাষ্ট্ৰীয় ঘাইপথ ৷ আনহাতে কৃত্ৰিম বানৰ বাবে নিশা বহুসময় ধৰি স্তব্ধ হৈ পৰে উজনি নামনি সংযোগী পথটো ৷ বৰ্তমানেও ৰাষ্ট্ৰীয় ঘাইপথটোত পানীৰ সোঁত বৈ থকা পৰিলক্ষিত হৈছে ৷ ইপিনে এই পৰ্যন্ত বৰষুণ অব্যাহত থকাৰ বাবে পুনৰ ৰাষ্ট্ৰীয় ঘাইপথটো বন্ধ হোৱাৰ আশংকাই দেখা দিছে ৷
