সৰুপথাৰ,10 জুলাই: গোলাঘাটৰ সৰুপথাৰৰ দপথাৰত অব্যাহত আছে বন্যহস্তীৰ সন্ত্ৰাস । শনিবাৰে পুৱাই গোলাঘাট জিলাৰ সৰুপথাৰৰ দপথাৰত বন্যহস্তীৰ আক্ৰমণত নিহত হৈছে এগৰাকী মহিলা । হাতীৰ আক্ৰমণত নিহত হোৱা মহিলা গৰাকীৰ নাম মিনা কটোৱাল(40) বুলি জানিব পৰা গৈছে ।
ঘটনাৰ বিৱৰণী অনুসৰি, দক্ষিণ নামবৰ বনাঞ্চলৰ পৰা টেঙানী-চাংপুল হৈ আহি আছিল এটা মখনা হাতী ৷ ইফালে মিনা কটোৱাল নিজ বাসগৃহতে চাহ বাগানত পাত চিঙি আছিল ৷ চাহ বাগানত পাত চিঙি থকা অৱস্থাতে মিনা কটোৱাল নামৰ মহিলাগৰাকীক আক্ৰমণ কৰে বন্য হস্তীটোৱে ৷
বন্য হস্তীটোৰ আক্ৰমণত গুৰুতৰভাৱে আহত হয় 40 বছৰীয়া মিনা কটোৱাল ৷ পৰৱৰ্তী সময়ত গুৰুতৰভাৱে আহত হোৱা মিনা কটোৱালক গোলাঘাটৰ স্বহীদ কুশল কোঁৱৰ অসামৰিক চিকিৎসালয়লৈ লৈ যোৱা হয় ৷ কিন্তু চিকিৎসকে মৃত বুলি ঘোষণা কৰে মিনা কটোৱালক ৷ ইফালে এই সমগ্ৰ ঘটনাৰ সন্দৰ্ভত বন বিভাগ আৰু আৰক্ষীক খবৰ দিয়া হয় ৷
সেই খবৰৰ ভিত্তিতে সৰুপথাৰৰ দপথাৰত উপস্থিত হয় বন সুৰক্ষা কৰ্মী তথা আৰক্ষী ৷ সৰুপথাৰৰ দপথাৰ-বছাপথাৰ অঞ্চলৰ পৰা ৰাইজৰ সহযোগত বন সুৰক্ষা কৰ্মীয়ে হাতীটোক অৰণ্যৰ মাজলৈ খেদি পঠিয়াবলৈ সক্ষম হয় ৷ এই সমগ্ৰ ঘটনাক কেন্দ্ৰ কৰি অঞ্চলটোৰ ৰাইজ বৰ্তমানেও আতংকিত হৈ থকা পৰিলক্ষিত হৈছে ৷
লগতে পঢ়ক: ক’ত উদ্ধাৰ হ’ল বাণ্ডিলে বাণ্ডিলে টকা !
