গোলাঘাট, ২৬ ডিচেম্বৰ: আৰক্ষীৰ চকুত ধূলি দি দীৰ্ঘদিন ধৰি চুৰি কাৰ্য চলাই অহা দুধৰ্ষ বাইক চোৰ কুৰবান আলীক গ্ৰেপ্তাৰ গোলাঘাট আৰক্ষীৰ । বিভিন্ন সময়ত ধৃত চোৰটোৱে তাৰ সহযোগীৰ সৈতে মিলি জিলাখনৰ ভিন্ন স্থানত চুৰিকাণ্ড সংঘটিত কৰি অহাত শনিবাৰে গোলাঘাট আৰক্ষীয়ে এক অভিযান চলায় । অভিযানকালত আৰক্ষীয়ে ফৰকাটিং অঞ্চলৰ নিবাসী কুৰবান আলীক গ্ৰেপ্তাৰ কৰে । সম্প্ৰতি আৰক্ষীৰ জেৰাত কুৰবান ।
ধৃত কুৰবানৰ স্বীকাৰোক্তিত গুদু আলী আৰু ৰাহুল বৰা নামৰ আন দুটা গভাইত চোৰৰ নাম উল্লেখ কৰে । সম্প্ৰতি গুদু আৰু ৰাহুলৰ সন্ধানত অভিযান অব্যাহত ৰাখিছে আৰক্ষীয়ে ।
উল্লেখ্য যে জিলাখনৰ হামদৈপুল, এ এচ টি চি কলনী, টেনপুৰ, শালমৰা আদি ভিন্ন স্থানত আৰক্ষীৰ নিদ্ৰাহৰণ কৰি দীৰ্ঘদিনে বাইক চোৰ কৰি সন্ত্ৰাস চলাই আহিছিল চোৰৰ দলটোৱে ।
লগতে পঢ়ক: গোৱালপাৰাত বন্যহস্তীৰ তাণ্ডৱ
