সৰুপথাৰ, 15 জুন : ৰাজ্যত শাম কটা নাই ক’ভিড (Covid 19) পৰিস্থিতি ৷ অব্যাহত আছে লক-ডাউন প্ৰক্ৰিয়া ৷ ক’ভিড (Covid 19)ৰ ফলত ৰাজ্যত অব্যাহত থকা মিনি লকডাউনে বিপদত পেলাইছে বৰপথাৰৰ এহাল পিতা-পুত্ৰক ৷ গোলাঘাট জিলাৰ বৰপথাৰ মৌজাৰ কৰ্দৈগুৰি গাঁৱত "ভাস্কৰ নাৰ্চাৰী" নামেৰে এখন নাৰ্চাৰী স্থাপন কৰি বিগত পাঁচ বছৰ ধৰি ফল-মূল, ফুলকে আদি কৰি বিভিন্ন প্ৰজাতিৰ গছ-গছনি নিজৰ নাৰ্চাৰীত ৰোপণ কৰি বজাৰত বিক্ৰী কৰি উপাৰ্জনৰ পথ মোকলাইছিল ৷
কিন্তু বৰ্তমান ক'ভিড-১৯ (Covid 19)ৰ সময় ৷ সমগ্ৰ ৰাজ্যৰ লগতে গোলাঘাটৰ বৰপথাৰ অঞ্চলতো প্ৰযোজ্য আছে মিনি লকডাউন । যাৰ ফলত ব্যৱসায়ী, কৃষককে ধৰি সকলো স্তৰৰ লোক হৈছে আৰ্থিকভাৱে ক্ষতিগ্ৰস্ত । আম, নাৰিকল, ডালিম, বগৰি, কমলা, নাচপতি, সাঁচী, অমিতা, তামোল, বিভিন্ন জাতৰ ফুল, অন্য বহুতো পুলি উপলব্ধ হোৱা "ভাস্কৰ নাৰ্চাৰী"ৰ গৰাকী বজাৰৰ অভাৱৰ বাবে বৰ্তমান লোকচানৰ সন্মুখীন হৈছে ।
যি দুই এটা বিক্ৰী নাৰ্চাৰীৰ পৰাই হয় যদিও সেইয়া পৰ্যাপ্ত নহয় । এতিয়া ক্ৰেতাৰ অভাৱত দীৰ্ঘদিনৰ পৰা উপাৰ্জনহীন হৈ আছে তেঁওলোক । ইপিনে বিগত ৫ বছৰে বিভিন্ন আবেদন-নিবেদন কৰিও কোনো চৰকাৰী আৰ্থিক নোপোৱাৰ কথাও জনাইছে পিতা-পুত্ৰ ক্ৰমে ইন্দ্ৰেশ্বৰ কাকতি আৰু ভাস্কৰজ্যোতি কাকতিয়ে ।
লগতে পঢ়ক : 1 লাখ নিৱনুৱাৰ লগতে অপ্ৰাদেশিকৃত শিক্ষকক নিযুক্তিৰ দাবী
