সৰুপথাৰ, 15 জুনঃ ১৯৪৩ চনৰ ১৫ জুনত ভাৰতৰ স্বাধীনতা আন্দোলনৰ সেনানী কুশল কোঁৱৰক বৃটিছ চৰকাৰে ৰে'ল বগৰোৱাৰ অভিযোগত প্ৰদান কৰিছিল মৃত্যুদণ্ড ৷ ১৯৪৩ চনৰ আজিৰ দিনটোতেই ফাঁচী কাঠত ওলমিছিল শ্বহীদ গৰাকী ৷ ধনশিৰি মহকুমাৰ সদৰ সৰুপথাৰত সোমবাৰে অনুষ্টুপীয়াকৈ, শ্বহীদ গৰাকীৰ ৭৭ তম মৃত্যু বাৰ্ষিকীত তেওঁলৈ শ্ৰদ্ধাঞ্জলি জ্ঞাপন কৰে ৷
সোমবাৰে পুৱা সৰুপথাৰ ৰাজহুৱা ভৱন চৌহদত থকা শ্বহীদ গৰাকীৰ প্ৰতিমূৰ্তিত ধনশিৰি মহকুমাৰ মহকুমাধিপতি, দিবাকৰ নাথে বন্তি প্ৰজ্বলন আৰু পুষ্পাঞ্জলি অৰ্পণ কৰি শ্ৰদ্ধা নিবেদন কৰে ৷ ইয়াৰোপৰি এই শ্ৰদ্ধাঞ্জলি অনুষ্ঠানত মুক্তি যুঁজাৰু সংস্থা, ধনশিৰি কৰ্মচাৰী পৰিষদ, ধনশিৰি মহকুমা সাংবাদিক সংস্থাকে ধৰি ভিন্ন সংস্থাৰ কেইবাগৰাকীও বিষয়ববীয়াই শ্বহীদ গৰাকীলৈ শ্ৰদ্ধাঞ্জলি জ্ঞাপন কৰে ৷ এই অনুষ্ঠানতে সৰুপথাৰ ৰে'ল ষ্টেচনৰ সমীপত শ্বহীদ কুশল কোঁৱৰৰ স্মৃতি ৰক্ষাৰ্থে এটি উদ্যান স্থাপনৰ বাবে অসম চৰকাৰক আহ্বান জনায় মুক্তি যুঁজাৰু সংস্থাই ৷
লগতে পঢ়কঃ একেলগে হাত ভৰি মুখেৰে ছবি আঁকিব পৰা যুৱকজন
