গোৱালপাৰা, 26 জুলাই : মৃত্যুদূতত পৰিণত হৈছে 17 নং ৰাষ্ট্ৰীয় ঘাইপথ । নিশা গোৱালপাৰা জিলাৰ ৰংজুলি আৰু দুধনৈত দুটাকৈ পৃথক পৃথক দুৰ্ঘটনা সংঘটিত হৈছে ৷ দুৰ্ঘটনা দুটাৰ ফলত থিতাতে দুজনকৈ লোক নিহত হোৱাৰ লগতে এজন গুৰুতৰভাৱে আহত বুলি জানিবলৈ পৰা গৈছে ।আহত গৰাকীক মুমূৰ্ষ অৱস্থাত চিকিৎসালয়ত ভৰ্তি কৰোৱা হৈছে ৷
জানিব পৰা মতে, মংগলবাৰৰ নিশা ৰংজুলিৰ পৰিদৰ্শন বঙলাৰ সমীপত এখন মটৰ চাইকেলক খুন্দিয়াই থৈ যায় কণ্টেইনাৰ এখনে ৷ প্ৰত্যেক্ষদৰ্শীয়ে দুৰ্ঘটনাটোৰ ফলত থিতাতে নিহত হোৱা যুৱকগৰাকী কামৰূপ (গ্ৰাম্য) জিলাৰ ৰাজাপাৰাৰ ককুৰমাৰা গাঁৱৰ দদশ্ৰী বসুমতাৰী বুলি জানিবলৈ দিয়ে ৷ খুন্দিয়াই যোৱা কণ্টেইনাৰখন পলায়ন কৰে বুলি জানিবলৈ দিয়ে ৷ দুৰ্ঘটনা সংঘটিত হোৱা য়ামাহা মটৰচাইকেলখনৰ পঞ্জীয়ন নম্বৰ AS 25 U 7915.
আনহাতে, 17 নং ৰাষ্ট্ৰীয় ঘাইপথৰ দুধনৈত সংঘটিত হয় আন এক দুৰ্ঘটনা । জানিব পৰামতে AS 01 BY 1067 মটৰ চাইকেল এখনে AS 01 NC 8437 নম্বৰৰ এখন ট্ৰাকৰ লগত সংঘৰ্ষ হোৱাত বাইক আৰোহী দুজনৰ এজন থিতাতে নিহত হয় । নিহত লোকজন লেলা পাহাৰতলীৰ নিৰেন বসুমতাৰী (21) বুলি জানিব পৰা গৈছে ৷ আনহাতে, আহত লোকজনৰ নাম প্ৰকাশ হাজোৱাৰী ।
ঘটনাস্থলীত দুধনৈ থানাৰ আৰক্ষী উপস্থিত হৈ আহত লোকজনক দুধনৈ প্ৰাথমিক স্বাস্থ্যকেন্দ্ৰলৈ প্ৰেৰণ কৰে ৷ লগতে নিহত লোকজনক মৰণোত্তৰ পৰীক্ষাৰ বাবে গোৱালপাৰা অসামৰিক চিকিৎসালয়লৈ প্ৰেৰণ কৰা হয় । 17 নং ৰাষ্ট্ৰীয় ঘাইপথৰ উক্ত এলেকাকেইটাত সঘনাই দুৰ্ঘটনা সংঘটিত হৈ আহিছে বুলি জানিবলৈ দিয়ে স্থানীয় ৰাইজে ৷
লগতে পঢ়ক : MNREGA scam: কামৰ বিনিময়ত নাপালে ধন; জেচিবি লৈ পঞ্চায়তে নিৰ্মাণ কৰা পথ খান্দিবলৈ উদ্যত মালিক
