গোৱালপাৰা, 17 চেপ্টেম্বৰঃ সদ্যপ্ৰকাশিত চূড়ান্ত এনআৰচিৰ তালিকাৰ পৰা 19,06,657 লোকৰ নাম বাদ পৰিছে ৷ এতিয়া এওঁলোকৰ একমাত্ৰ ভৰসা বিদেশী ন্যায়াধীকৰণ ৷ বিদেশী ন্যায়াধীকৰণে থিৰাং কৰিব এনআৰচিত নাম নথকা লোক সকলৰ ভিতৰত কোন বিদেশী আৰু কোন স্বদেশী ৷ ইয়াৰ মাজতে বিদেশী ন্যায়াধীকৰণে বিদেশী ঘোষণা কৰিবলগীয়া লোকসকলক ৰাখিবৰ বাবে গোৱালপাৰা মাটিয়াত নিৰ্মাণ কৰি থকা হৈছে দেশৰ ভিতৰতে সৰ্ববৃহৎ ডিটেনচন কেম্পটো ৷
2.5 হেক্টৰ মাটিত নিৰ্মাণ কৰা হৈছে এই কেম্পটো ৷ 45 কোটি টকা ব্যয়ৰে নিৰ্মাণ কৰা এই কেম্পটোত 3 হেজাৰ লোকৰ খোৱা আৰু থকাৰ সুব্যৱস্থা থকাৰ লগতে পুৰুষ আৰু মহিলাৰ বাবে আছে পৃথকে পৃথকে কোঠা ৷ অৰ্থাৎ 6-7 খন ফুটবল খেলপথাৰৰ সমান হ'ব এই ডিটেনচন কেম্পৰ পৰিধি ৷ আগন্তুক ডিচেম্বৰ মাহত নিৰ্মাণ সম্পূৰ্ণ হ'বলগীয়া এই কেম্পত থাকিব এটা সুবিশাল সভাগৃহ, 180টা প্ৰসাৱগাৰ, 15 টা অট্টালিকা আৰু কাৰাবন্দী সকলৰ স্বাস্থ্য আৰু সন্তানৰ বাবে থাকিব, চিকিৎসালয় আৰু শিক্ষানুষ্ঠান৷ কেন্দ্ৰৰ নিৰ্দেশত শেহতীয়াকৈ কেম্পটোৰ নিৰ্মাণৰ প্ৰক্ৰিয়া দ্ৰুত গতিত আগবাঢ়িছে । দিনে-নিশাই চলিছে ডিটেনচন কেম্পটোৰ নিৰ্মাণ কাৰ্য ৷
উল্লেখ্য যে 500ৰো অধিক শ্ৰমিকে নিৰ্মাণ কৰি থকা এই কেম্পৰ একাংশ শ্ৰমিকৰে নাম নাই এনআৰচিত ৷এনআৰচিত নাম নথকা অধিকাংশই মহিলা শ্ৰমিক ৷ সাংবাদিকৰ আগত আবেগিক হৈ চিন্তিত শ্ৰমিক এজনে ক'লে- আমি নিজে হাতেৰে নিৰ্মাণ কৰি আছো নেকি আমাৰ কাৰাগাৰ?
