হাফলং, ১০ মে': ডিমা হাছাও জিলাৰ সদৰ হাফলঙত পানীৰ তীব্ৰ সংকট দেখা দিয়াৰ ফলত হাহাকাৰ পৰিস্থিতিৰ সৃষ্টি হৈছে । খোৱা পানীৰ বাবে সাধাৰণ ৰাইজে হাহাকাৰ কৰিব লগা হৈছে (Water crisis in Half Long)। পানীৰ বাবে এতিয়া হাফলং চহৰৰ বিভিন্ন মন্দিৰত ৰাইজে পূজা কৰিছে । হাফলং চহৰৰ বিভিন্ন ঠাইত কেইবামাহ ধৰি পানীৰ যোগান ধৰা নাই জনস্বাস্থ্য কাৰিকৰী বিভাগে । চৰকাৰে পানীৰ আঁচনিৰ বাবে কোটি কোটি টকা ব্যয় কৰিলেও হাফলং চহৰত পানীৰ সমস্যাৰ আজি লৈকে সমাধান হোৱা নাই ।
জিলাখনত যোৱা 6 মাহৰ পৰা বৰষুণ হোৱা নাই । যাৰ বাবে জলাশয়সমূহ আৰু জনস্বাস্থ্য কাৰিকৰী বিভাগৰ পানীৰ উৎস স্থলসমূহ শুকাই গৈছে । পাহাৰীয়া নৈসমূহত পানী নোহোৱা বাবে এনেদৰে পানীৰ তীব্ৰ সংকটে দেখা দিছে । জনস্বাস্থ্য কাৰিকৰী বিভাগৰ পানী যোগান অনিয়মীয়া হৈ পৰিছে (Public Health Technical Department)।
যোৱা বছৰৰ মে' মাহত ডিমা হাছাও জিলাত প্ৰবল বৰষুণৰ বাবে পাহাৰীয়া জিলাখন প্ৰবল প্ৰাকৃতিক দুৰ্যোগৰ কৱলত পৰিছিল । এইবাৰ বৰষুণ নোহোৱাৰ বাবে ভয়ংকৰ পানীৰ সংকটত পৰিছে হাফলং চহৰৰ সাধাৰণ ৰাইজ । হাফলং জনস্বাস্থ্য কাৰীগৰি বিভাগে এখন সংবাদমেলৰ আয়োজন কৰি কৰ্তৃপক্ষই জনাইছিল যে, বৰষুণৰ অভাৱত জনস্বাস্থ্য কাৰিকৰী বিভাগৰ উৎসস্থলসমূহ শুকাই গৈছে । যাৰ বাবে হাফলং চহৰত পানীৰ যোগান ধৰা হোৱা নাই । বৰষুণ নহ'লে হাফলং চহৰত পানীৰ যোগান ধৰা সম্ভৱ নহ'ব বুলি বিভাগী উল্লেখ কৰি এতিয়া ভগবানেই একমাত্ৰ ভৰসা বুলি কৈছিল ।
ইপিনে, সাধাৰণ ৰাইজে অভিযোগ উত্থাপন কৰি কয় যে, হাফলঙত পানীৰ সমস্যাই দেখা দিয়াৰ একমাত্ৰ কাৰণ হৈছে পাহাৰীয়া নৈৰ পৰা অবৈধভাৱে শিল সংগ্ৰহ । একাংশ লোকে অবাধে শিল সংগ্ৰহ কৰি বাহিৰলৈ নিয়েই আছে । বিশেষকৈ কিছু অবৈধ ব্যৱসায়ীয়ে জাতিংগা নৈৰ পৰা অবৈধভাৱে শিল সংগ্ৰহ কৰি বাহিৰত বিক্ৰী কৰাৰ অভিযোগ উত্থাপিত হৈছে । জাতিংগা নৈৰ এনে দৃশ্য ইয়াৰেই প্ৰমাণ কৰে নৈত এতিয়া এটাও শিল নাই । প্ৰতিদিনে ট্ৰাক ভৰ্তি কৰি জাতিংগা নৈ খনন কৰি শিল বাহিৰলৈ নিয়াত নৈয়ে পানী ধৰি ৰাখিব পৰা নাই ।
তদুপৰি ডিমা হাছাও জিলাত বনাঞ্চল ধ্বংসযজ্ঞ চলি আছে । গছ কাটি বনাঞ্চল ধ্বংসৰ মুখলৈ ঠেলি দিছে চোৰাং ব্যৱসায়ীসকলে । এনে বনাঞ্চল ধ্বংসৰ বাবে প্ৰাকৃতিক ভাৰসাম্য ৰক্ষাৰ ক্ষেত্ৰত নিতৌ প্ৰতিবন্ধকতাৰ সৃষ্টি হৈছে । যাৰ বাবে এই পাহাৰীয়া জিলাখনত বৰষুণৰ পৰিমাণ হ্ৰাস পাইছে ।
লগতে পঢ়ক:Braille Hemkosh: তেজপুৰ বিশ্ববিদ্যালয়ক প্ৰথমখন পূৰ্ণাংগ ব্ৰেইলী লিপি অভিধান হেমকোষ প্ৰদান
