ডিমা হাছাও, 21 মাৰ্চ : দৌলোৎসৱৰ আনন্দ-উল্লাসৰ মাজতে ডিমা হাছাওত সংঘটিত মাৰপিটৰ ঘটনা ৷ দুৰ্বৃত্তৰ আক্ৰমণত গুৰুতৰভাৱে আহত দুই ভাতৃ ৷ ঘটনাৰ বিৱৰণী অনুসৰি, শনিবাৰে দুপৰীয়া মাহুৰ বজাৰত এগৰাকী জনজাতীয় যুৱকৰ সৈতে লিটন পাল নামৰ এগৰাকী ব্যক্তিৰ মাৰপিটৰ ঘটনা সংঘটিত হয় ৷ অৱশ্যে সেই সময়ত বজাৰখনত উপস্থিত থকা একাংশ ব্যৱসায়ীৰ মধ্যস্থতাৰ ফলত কাজিয়াৰ শাম কাটে ৷
একেদিনাই মাজনিশা প্ৰায় 1 বজাত 80 জনীয়া দুৰ্বৃত্তৰ এটা দলে লিটন পালৰ বাসগৃহত প্ৰৱেশ কৰি পালৰ লগতে ভাতৃৰ ওপৰত অবৰ্ণনীয় অত্যাচাৰ চলোৱাৰ অভিযোগ (Two brothers attacked by miscreants) উত্থাপিত হৈছে ৷ দুৰ্বৃত্তৰ দলটোৱে দুয়ো ভাতৃক গুৰুলা-গুৰুলকৈ প্ৰহাৰ কৰাৰ ফলত দুয়োগৰাকী আঘাতপ্ৰাপ্ত হয় ৷ পৰৱৰ্তী সময়ত ঘটনা সম্পৰ্কে খবৰ দিয়া হয় মাহুৰ আৰক্ষীক ৷
ঘটনাস্থলীত আৰক্ষীৰ এটা দল উপস্থিত হৈ লিটন পালৰ লগতে ভাতৃ প্ৰণৱজ্যোতি পালক উদ্ধাৰ কৰি উন্নত চিকিৎসাৰ বাবে হাফলং অসামৰিক চিকিৎসালয় (Haflong Civil Hospital) লৈ প্ৰেৰণ কৰে ৷ সম্প্ৰতি চিকিৎসাধীন অৱস্থাত আছে পাল ভাতৃদ্বয় ৷ তদুপৰি এই সন্দৰ্ভত মাহুৰ আৰক্ষী থানাত এটি গোচৰ ৰুজু কৰা বুলি আৰক্ষীসূত্ৰে প্ৰকাশ কৰিছে ৷
লগতে চাওক: নিলম্বিত কংগ্ৰেছ বিধায়ক শশীকান্ত দাসক সাক্ষাৎ মুখ্যমন্ত্ৰীৰ
