ডিমা হাছাও, 13 অক্টোবৰ: নিপকোৰ কাৰ্বি লাংপি জলবিদ্যুৎ প্ৰকল্পৰ জল পৰিবাহী পাইপ লাইন বিস্ফোৰণৰ সাতদিন অতিক্ৰম কৰাৰ পাছত সন্ধানহীন চাৰি কৰ্মীৰ উদ্ধাৰ অভিযান আৰম্ভ কৰিলে এন ডি আৰ এফ আৰু এছ ডি আৰ এফ বাহিনীয়ে ৷ যোৱা 7 অক্টোবৰত জল বিদ্যুৎ প্ৰকল্পটোৰ জল পৰিবাহী লাইনত বিস্ফোৰণ হৈ সৃষ্টি হোৱা জলপ্ৰলয়ত ফলত কপিলীৰ পানীত উটি গৈছিল এগৰাকী অভিযন্তাৰ লগতে চাৰিজন কৰ্মী ৷ দেওবাৰে পানীৰ স্তৰ নিম্নগামী হোৱাৰ পাছত ঘটনাস্থলীত উপস্থিত হৈ উদ্ধাৰ অভিযান আৰম্ভ কৰিছে এনডিআৰএফ আৰু এছডিআৰএফৰ এটা দলে ৷
দেওবাৰে দিনজোৰা এই অভিযান কালত সন্ধানহীন চাৰি কৰ্মীৰ কোনো সন্ধান উলিয়াব নোৱাৰিলে উদ্ধাৰকাৰী দলটোৱে ৷ উল্লেখযোগ্য যে, কপিলী জল বিদ্যুৎ প্ৰকল্পস্থলীত পাইপ লাইন বিস্ফোৰণ হোৱাৰ পিছৰে পৰা 90 শতাংশ ছিষ্টেম বিকল হৈ পৰিছে নিপকো পাৱাৰ হাউছৰ, যাৰ ফলত কপিলী জলবিদ্যুৎ প্ৰকল্পৰ 800 মিটাৰ এলেকাজুৰি এতিয়াও অব্যাহত আছে কপিলীৰ বাঢ়নি পানীৰ ধ্বংসলীলা ৷
