ডিমা হাছাও,8 মাৰ্চ: দেওবাৰে ডিমা হাছাওৰ মাইবাং ডিহৰ ফংলো এলেকাত সংঘটিত হয় এক ভয়ংকৰ অগ্নিকাণ্ডৰ ঘটনা ৷ অগ্নিকাণ্ডত এগৰাকী মহিলা জীৱন্তে অগ্নিদগ্ধ হৈ মৃত্যুমুখত পৰাৰ লগতে জুইত সম্পূৰ্ণৰূপে জাহ যায় বাসগৃহ সহ সা-সম্পত্তি ৷ জানিব পৰা মতে, দেওবাৰে নিশা 8.30 বজাত ফংলো এলেকাৰ ৰাষ্ট্ৰীয় ঘাইপথৰ সমীপত গবীন্দ্ৰ হোজাই নামৰ এগৰাকী ব্যক্তিৰ বাসগৃহত হঠাৎ জুইয়ে আৱৰি ধৰে ৷ তদুপৰি বাসগৃহটোত নিদ্ৰাৰত অৱস্থাত থকা মহিলাগৰাকীয়ে গমেই নাপালে অগ্নিকাণ্ডৰ কথা ৷ যাৰ ফলত পলকতে জীৱন্তে অগ্নিদগ্ধ হৈ মৃত্যুমুখত পৰে মহিলাগৰাকী ৷
ইপিনে অগ্নিকাণ্ড সংঘটিত হোৱাৰ খবৰ পোৱা মাত্ৰকে মাইবং আৰক্ষী আৰু অগ্নি নিৰ্বাপক বাহিনী ঘটনাস্থলীত উপস্থিত হয় ৷ কিন্তু মহিলাগৰাকীক উদ্ধাৰ কৰিবলৈ সক্ষম নহ'ল ৷ লক্ষণীয়ভাৱে যোৱা দুদিন ধৰি বিদ্যুৎ পৰিসেৱা ব্যাহত হৈ থকাৰ স্বত্বেও কি কাৰণে এই অগ্নিকাণ্ডৰ ঘটনা সংঘটিত হ'বলৈ পালে সেয়া এতিয়াও ৰহস্যৰ আৱৰ্তত ৷ মাইবং আৰক্ষীয়ে ঘটনা সন্দৰ্ভত অব্যাহত ৰাখিছে তদন্ত ৷
লগতে পঢ়কঃ জাঁজীত মিত্ৰজোঁটৰ প্ৰাৰ্থী প্ৰদীপ হাজৰিকাক বিপুল আদৰণি
