মৰাণ,18 মে': কৰ'ণাৰ দ্বিতীয়টো ঢৌৱে সমগ্ৰ দেশত সংহাৰী ৰূপ লোৱাত অক্সিজেনৰ অভাৱত মৃত্যু মুখত পৰিছে দেশৰ হাজাৰ হাজাৰ লোক ৷ যাৰ ফলত এক অবৰ্ণনীয় পৰিৱেশৰ সৃষ্টি হৈছে সমগ্ৰ দেশত ৷ ঠিক তেনে সময়তে ডিব্ৰুগড় জিলাৰ মৰাণ বিধানসভা সমষ্টিৰ জকাই সাহিত্য মনীষী উপবন চৰ্চালৈ আহিছে ৷ বিগত বছৰত প্ৰাক্তন মুখ্যমন্ত্ৰী সৰ্বানন্দ সোণোৱালে উদ্বোধন কৰা উপবনখনত অসমৰ বিশিষ্ট সাহিত্যিকসকলৰ নামত ৰোপণ কৰি আহিছে এজোপাকৈ গছপুলি ৷
কিন্তু ক'ভিডৰ সংক্ৰমণৰ বাবে উদ্যানখন বন্ধ হৈ আছে যদিও উদ্যানখনত ৰোপণ কৰা মূল্যবান গছসমূহে ঠন ধৰি উঠাত এক মনোমোহা পৰিৱেশে বিৰাজ কৰিছে ৷ প্ৰকৃতি সংৰক্ষণৰ এক সুন্দৰ নিদৰ্শন দেখুৱাই অহা উদ্যানখনৰ কৰ্তৃপক্ষক শলাগ লৈছে সকলোৱে ৷ জকাই বন বিভাগৰ অধীনত থকা জৈৱিক বৈচিত্ৰ্যৰ উদ্যানখন ভবিষ্যতে পৰ্যটনৰ আকৰ্ষণীয় কেন্দ্ৰ হিচাপে গঢ়ি উঠাৰ সম্ভাৱনা থকাৰ বাবে নতুন চৰকাৰ আৰু বিভাগীয় কৰ্তৃপক্ষক সাহিত্য মনীষী উপবনখন সু-পৰিকল্পনাৰে কাৰ্যক্ষম কৰিবলৈ আহ্বান জনাইছে সকলোৱে ।
লগতে পঢ়ক: বিধায়ক ৰূপক শৰ্মাৰ ক’ভিড চিকিৎসা কেন্দ্ৰ পৰিদৰ্শন
