মৰাণ, 7 নৱেম্বৰঃ ৰাজ্যৰ বিভিন্ন প্ৰান্তত মাইক্ৰ' ফাইনেন্স কোম্পানীৰ বিৰুদ্ধে একাংশ দল সংগঠনৰ নেতৃত্বত আন্দোলন চলি থকা সময়তে মৰাণত দেখিবলৈ পোৱা গ'ল এখন বিপৰীত ছবি । বৃহস্পতিবাৰে মৰাণৰ গড়কাপ্তানি পৰিদৰ্শন ভৱনৰ চৌহদত মাইক্ৰ' ফাইনেন্স কোম্পানীৰ সপক্ষে সমবেত হ'ল প্ৰায় দুই শতাধিক মহিলা । উপস্থিত থাকিল বন্ধন,আৰোহণ,এল এনটিকে আদি কৰি কেইবাটাও মাইক্ৰ' ফাইনেন্স কোম্পানীৰ বিষয়ববীয়া । মাইক্ৰ' ফাইনেন্স কোম্পানীৰ জৰিয়তে দুখীয়া ৰাইজৰ সুবিধা হোৱাকৈ আৰ্থিক ঋণ প্ৰদান কৰাৰ বাবে সমূহ মৰাণবাসী হৈ কোম্পানীৰ বিষয়ববীয়া সকলক কৃতজ্ঞতা স্বীকাৰ আৰু সম্বৰ্ধনা জনোৱাৰ উদ্দেশ্যে মামণি বৰঠাকুৰৰ নেতৃত্বত এখন সভা অনুষ্ঠিত হয় ।
সভাত কোম্পানী সমূহৰ কেইবাজনো বিষয়ববীয়াই নিজৰ নিজৰ মন্তব্য দাঙি ধৰে । তেওঁলোকৰ মতে, গ্ৰাম্যঞ্চলৰ মহিলা সকলক স্বাৱলম্বী হোৱাৰ উদ্দেশ্যে এই কোম্পানীবিলাকে ঋণ যোগান ধৰে । অতি কম সুতত প্ৰদান কৰা এই ঋণে তেওঁলোকক যথেষ্ট সহায় কৰিছে বুলি উল্লেখ কৰি কোম্পানীৰ বিষয়ববীয়া সকলে কয় যে, বৰ্তমান বহু মহিলাই এই ঋণ লৈ স্বাৱলম্বী হোৱাৰো বহুত উদাহৰণ আছে । তেওঁলোকে লগতে গ্ৰাম্যঞ্চললৈ ঋণৰ কিস্তি সংগ্ৰহৰ বাবে যোৱা কোম্পানীৰ একাংশ কৰ্মীক গাঁৱৰ একাংশ মহিলাই অপদস্থ কৰে বুলিও উল্লেখ কৰে ।
