ডিব্ৰুগড়,16 ফেব্ৰুৱাৰী: প্ৰেমৰ দিৱস ভেলেন্টাইন দে'ৰ দিনটোতে ডিব্ৰুগড়ত এচিড আক্ৰমণৰ বলি হোৱা মহিলা গৰাকীৰ স্বাস্থ্যাৱস্থাৰ সম্পৰ্কে জনাইছে অসম চিকিৎসা মহাবিদ্যালয়ৰ অধীক্ষকে ৷ ততাতৈয়াকৈ উপযুক্ত ব্যৱস্থা গ্ৰহণ কৰিছে যদিও মহিলা গৰাকী সম্পূৰ্ণ সুস্থ হৈ উঠিবলৈ কিছু সময়ৰ প্ৰয়োজন হ'ব বুলি জনাইছে অধীক্ষক গৰাকীয়ে ৷ কিন্তু মহিলা গৰাকী সংকটমুক্ত বুলি জনাইছে অসম চিকিৎসা মহাবিদ্যালয়ৰ অধীক্ষক ডাঃ প্ৰশান্ত দিহীঙিয়াই ৷
উল্লেখ্য যে,ভেলেন্টাইন দেৰ দিনা ডিব্ৰুগড়ৰ আমোলাপট্ৰী নাট্য মন্দিৰৰ সমীপত হাজৰিকা উপাধিৰ 32 বছৰীয়া মহিলা গৰাকীক এচিডেৰে আক্ৰমণ কৰিছিল বুদ্ধদেৱ দাস (৫০) ওৰফে এপেল দাস নামৰ ব্যক্তি গৰাকীয়ে ৷ তেতিয়াৰে পৰা বৰ্তমানেও ডিব্ৰুগড়ৰ অসম চিকিৎসা মহাবিদ্যালয়ত চিকিৎসাধীন হৈ আছে মহিলা গৰাকী ৷ জানিব পৰা মতে,মহিলা গৰাকীয়ে ডিব্ৰুগড় আমোলাপট্ৰী নিজৰা পথত বায়েকৰ ঘৰত থাকি চুহম চপিং মলত কাম কৰি আহিছে ৷ ভেলেন্টাইন দে'ৰ দিনটোৰ সন্ধিয়া চুহম চপিং মলৰ পৰা কাম কৰি উভতি যোৱা পথতে আক্ৰমণৰ বলি হৈছিল মহিলা গৰাকী ৷ ইতিমধ্য়ে অভিযুক্ত বুদ্ধদেৱ দাসক আটক কৰি তদন্ত অব্য়াহত ৰাখিছে আৰক্ষীয়ে ৷
