টিংখাং, 27 আগষ্টঃ ডিব্ৰুগড় জিলাৰ টিংখাঙৰ ধমনত অৱস্থিত এখন নাম ফলক বিহীন পশু চিকিৎসা কেন্দ্ৰ ৷ 2014 চনতে এই পশু চিকিৎসা কেন্দ্ৰতো নিৰ্মাণ কৰা হৈছিল যদিও আজি পৰ্যন্ত মুকলি নহ'ল এই পশু চিকিৎসা কেন্দ্ৰতো ৷
স্থানীয় ৰাইজৰ তথ্য অনুসৰি, ইতিমধ্যে চিকিৎসালয়খনৰ গৃহৰ বেৰ আৰু মজিয়াৰ কোনো কোনো অংশত ফাট মেলিবলৈ আৰম্ভ কৰাৰ লগতে নষ্ট হ'বলৈ ধৰিছে সকলো সা- সৰঞ্জাম। অৱশ্যে স্থানীয় ৰাইজে অধিক ক্ষয়ক্ষতিৰ পৰা ৰক্ষণাবেক্ষণ দি আহিছে চৰকাৰী গৃহটো।
উল্লেখ্য যে, বুঢ়ীদিহিঙৰ পাৰৰ বানবিধ্বস্ত অঞ্চলটোৰ ধমন , চেচানেপালি , আঘোণিবাৰী আদি কেইবাখনো গাঁৱৰ কৃষক ৰাইজৰ জীৱিকাৰ চালিকা শক্তি হৈছে পশুধন৷ উক্ত অঞ্চল সমূহত চিকিৎসাৰ অভাৱত বছৰে-বছৰে বহু পশুধনৰ মৃত্যু হয়৷ তেনেস্থলত নিৰ্মাণ সম্পূৰ্ণ হোৱাৰ 5 বছৰ উকলি যোৱাৰ পাচতো পশু চিকিৎসালয়খন মুকলি নোহোৱাত এতিয়া আশাহত হৈ পৰিছে কৃষিজীৱী ৰাইজ৷ ইপিনে চিকিৎসালয় খনৰ তদাৰকৰ বাবে এজন চতুৰ্থ বৰ্গৰ কৰ্মচাৰী নিয়োগ হৈ আছে যদিও আজিলৈকে ৰাইজে তেওঁৰ দৰ্শন লাভ কৰা নাই৷ সেয়ে স্থানীয় সচেতন মহলৰ লগতে অসম জাতীয়তাবাদী যুৱ ছাত্ৰ পৰিষদৰ টিংখাং আঞ্চলিক সমিতিয়ে অঞ্চলটোৰ পশুপালক সকলৰ দীৰ্ঘদিনীয়া অভাৱ পূৰণ কৰি জীৱন-জীৱিকাৰ পথ সুগম কৰি তুলিবলৈ ৰাজ্য চৰকাৰ তথা বিয়াগোম পশুপালন বিভাগৰ প্ৰতি দাবী জনাইছে ।
