ডিব্ৰুগড়,22 জুন: দলবদ্ধ কিশোৰী ধৰ্ষণৰ ঘটনাই উত্তপ্ত পৰিস্থিতিৰ সৃষ্টি কৰা ডিব্ৰুগড়ত আৰক্ষীয়ে গ্ৰেপ্তাৰ কৰিছে দুজন অভিযুক্তক ৷ গ্ৰেপ্তাৰ কৰা যুৱক দুজন ক্ৰমে প্ৰদীপ দাস ওৰফে ব্ৰেট লী আৰু ঘোংৰু থাপা বুলি জানিব পৰা গৈছে । ঘটনাৰ বিৱৰণী অনুসৰি, শনিবাৰে নিশা এগৰাকী কিশোৰীক ৰাজপথৰ পৰা মটৰ চাইকেলেৰে অপহৰণ কৰি এটা চাৰিজনীয়া যুৱকৰ দলে চহৰখনৰ জালান নগৰ চাহ বাগানত ধৰ্ষণ কৰে ৷ ঘটনাত জড়িতৰ সন্দেহত আৰক্ষীয়ে বিকি ৰায় আৰু বিকাশ ৰায় নামৰ দুজনক দেওবাৰে নিশা গ্ৰেপ্তাৰ কৰাৰ পিছত সোমবাৰে পুনৰ দুগৰাকী অভিযুক্তক গ্ৰেপ্তাৰ কৰিবলৈ সক্ষম হৈছে ৷
উল্লেখ্য যে, মুখ্যমন্ত্ৰীৰ ডিব্ৰুগড় ভ্ৰমণৰ পৰিপ্ৰেক্ষিতত নিৰাপত্তাৰক্ষীৰে গিজগিজাই থকাৰ সময়তে শনিবাৰে এই ধৰ্ষণকাণ্ড সংঘটিত হৈছিল ৷ ভুক্তভোগী কিশোৰীগৰাকীয়ে বান্ধৱীৰ ঘৰৰ পৰা বায়েকৰ ঘৰলৈ গৈ থকা অৱস্থাতে আন্ধাৰৰ সুযোগ গ্ৰহণ কৰি চাৰিজন ব্যক্তিয়ে ধৰ্ষণ কৰিছিল ৷
আনহাতে, বিগত কিছুদিনৰ পৰা একাংশ বিজেপি কৰ্মীৰ কৰ্মকাণ্ডই ছ’চিয়েল মেডিয়াত ব্যাপক খলকনি সৃষ্টি কৰাৰ সময়তে পুনৰবাৰ চৰ্চালৈ আহিছে এই কাণ্ডত জড়িতৰ সন্দেহত আৰক্ষীয়ে গ্ৰেপ্তাৰ কৰা বিকাশ ৰায়ৰ নাম ৷ ৰায় পূৰ্বৰে পৰা বিজেপিৰ কেন্দ্ৰীয় মন্ত্ৰী,বিধায়কৰ লগত ঘনিষ্ঠ বুলি ইতিমধ্যে ছ’চিয়েল মেডিয়াত প্ৰচাৰ হৈছিল ৷ ঘটনা সন্দৰ্ভত ইতিমধ্যে ডিব্ৰুগড় আৰক্ষী থানাত 989/2020 নম্বৰত ৰুজু হৈছে এক গোচৰ ৷ আৰক্ষীয়ে প্ৰাথমিক তদন্তৰ ভিত্তিতে গ্ৰেপ্তাৰ কৰে অভিযুক্ত চাৰিজনক ৷
লগতে চাওকঃ কোকৰাঝাৰত উপস্থিত ৰাজ্যপাল জগদীশ মুখী
