টিংখাং, 2 ফেব্ৰুৱাৰী: টিংখাঙৰ ৰাজগড় ব্যৱসায়ী সন্থাৰ ব্যতিক্ৰমী পদক্ষেপ ৷ “এই মাহৰ অতিথি” অনুষ্ঠানৰ শুভাৰম্ভ ৷ ৰাজগড় ব্যৱসায়ী সন্থাই আৰম্ভ কৰিছে এক নতুন আৰু ব্যতিক্ৰমী অনুষ্ঠান ৷ কেৱল ব্যৱসায়-বাণিজ্যতে সীমাবদ্ধ নাথাকি অসমীয়া ভাষা,কৃষ্টি, সংস্কৃতিৰ প্ৰচাৰ আৰু প্ৰসাৰৰ বাবে ব্যৱসায়ী সন্থাই গ্ৰহণ কৰি আহিছে বিভিন্ন পদক্ষেপ ৷ তাৰ ভিতৰত ব্যৱসায়ী সন্থাই সোমবাৰৰ পৰা পোন প্ৰথমবাৰৰ বাবে আৰম্ভ কৰিছে “এই মাহৰ অতিথি” শীৰ্ষক এক নতুন অনুষ্ঠান ৷
উল্লেখ্য যে, ৰাজগড় ব্যৱসায়ী সন্থাৰ অন্যতম যুটীয়া সম্পাদক নীৰজ জয়ছোৱালে উদ্দেশ্য ব্যাখা কৰা আৰু চিন্ময়জ্যোতি হাজৰিকাই আঁতধৰা অনুষ্ঠানটি ব্যৱসায়ী সন্থাৰ সভাপতি বিপ্লৱ ধাদুমীয়াৰ সঞ্চালনাত অনুষ্ঠিত কৰা হয় ৷ ৰাজগড় ব্যৱসায়ী সন্থাৰ কাৰ্যালয়ত অনুষ্ঠিত হোৱা অনুষ্ঠানটি শুভাৰম্ভ কৰে “আপকু”ৰ মুখ্য উপদেষ্টা মনোজ সিঙে ৷ এই মাহৰ অতিথি হিচাপে অনুষ্ঠানটোত উপস্থিত থাকে ৰাজগড় উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষক তথা ৰাজগড়ত "জনপ্ৰিয় পুথিঘৰ”ৰ জৰিয়তে ব্যৱসায় আৰম্ভ কৰা পৰেশ বৰুৱা ৷ শিক্ষকতা জীৱনৰ স্মৃতি ৰোমন্থনৰ লগতে গুৰু-শিস্যৰ মাজত থকা শ্ৰদ্ধা-ভক্তিৰ কথা আলোকপাত কৰাত অনুষ্ঠানটি গম্ভীৰ হৈ পৰে ৷
শিক্ষকতাৰ উপৰিও পৰেশ বৰুৱা অঞ্চলটোৰ বিভিন্ন সামাজিক কাম কাজত জড়িত হোৱাৰ উপৰিও “জনপ্ৰিয় পুথিঘৰ”ৰ যোগেদি অঞ্চলটোত বৌদ্ধিক বাতাবৰণ গঢ়ি তোলাত এক অনন্য ভূমিকা গ্ৰহণ কৰি আহিছে ৷ 2005 বৰ্ষত তেখেতে শুভাৰম্ভ কৰা “জনপ্ৰিয় পুথিঘৰ”ৰ সোণালী জয়ন্তী উদযাপন কৰিব ৰাজগড় ব্যৱসায়ী সন্থাই ৷ এই মাহৰ অতিথি অনুষ্ঠানটিৰ যোগেদি অৱসৰপ্ৰাপ্ত শিক্ষকগৰাকীয়ে ৰাজগড় ব্যৱসায়ী সন্থাৰ পদক্ষেপক ভূয়সী প্ৰশংসা কৰাৰ লগতে সন্থাৰ সকলো সদস্যকে ধৈৰ্য্য,মিঠামুখীয়া,একাগ্ৰতা আৰু আত্মবিশ্বাসেৰে আগুৱাই যাবলৈ আহ্বান জনায় ৷
লগতে পঢ়ক: ফেব্ৰুৱাৰীৰ ভিতৰত নিৰ্বাচনী অধিসূচনা জাৰিৰ সম্ভাৱনা ৰাজ্যত
