Assam Taekwondo coach died: হায়দৰাবাদত পথ দুৰ্ঘটনাত টাইকোৱাণ্ডো প্ৰশিক্ষক দিগন্ত বৰাৰ মৃত্যু

হায়দৰাবাদত পথ দুৰ্ঘটনাত পতিত হৈ অসমৰ ক্ৰীড়াবিদৰ দিগন্ত বৰাৰ মৃত্যু ৷ অসম দলৰ টাইকোৱাণ্ডো প্ৰশিক্ষক আছিল দিগন্ত বৰা ৷ অসমৰ এটা দল লৈ হায়দাৰাবাদত ৰাষ্ট্ৰীয় কেডেট টাইকোৱাণ্ডো চেম্পিয়নশ্বিপত অংশগ্ৰহণৰ বাবে গৈছিল দিগন্ত (Taekwondo coach Diganta Bora) ৷

ডিব্ৰুগড়, 24 ফেব্ৰুৱাৰী: অসমৰ ক্ৰীড়া জগতৰ বাবে এটা দুঃসংবাদ ৷ বহিঃৰাজ্যত ৰাষ্ট্ৰীয় প্ৰতিযোগিতাত অংশগ্ৰহণ কৰিবলৈ গৈ মৃত্যু অসমৰ ক্ৰীড়া প্ৰশিক্ষকৰ ৷ হায়দৰাবাদত পথ দুৰ্ঘটনাত পতিত হৈ মৃত্যু হয় অসম দলৰ টাইকোৱাণ্ডো প্ৰশিক্ষক দিগন্ত বৰাৰ (Taekwondo coach Diganta Bora died) ৷

উল্লেখ্য যে, হায়দৰাবাদত শুকুৰবাৰ অৰ্থাৎ আজিৰ পৰা অনুষ্ঠিত হৈছে ৰাষ্ট্ৰীয় কেডেট টাইকোৱাণ্ডো চেম্পিয়নশ্বিপ (Cadet Taekwondo Championship) ৷ এই প্ৰতিযোগিতাত অংশগ্ৰহণৰ বাবে অসমৰ 3 গৰাকী খেলুৱৈক লৈ হায়দৰাবাদলৈ গৈছিল প্ৰশিক্ষক দিগন্ত বৰা ৷ কিন্তু প্ৰতিযোগিতা আৰম্ভ হোৱাৰ পূৰ্বেই ঘটিল এই অনাকাংক্ষিত ঘটনা ৷ বুধবাৰে এখন বাছৰ খুন্দাত মৃত্যুক সাৱটি লয় অসম দলৰ টাইকোৱাণ্ডো প্ৰশিক্ষক দিগন্ত বৰাই (Diganta Bora killed in Road accident) ৷

নৈশ আহাৰ গ্ৰহণ কৰাৰ পাচত পুনৰ হোটেললৈ উভতি অহাৰ সময়তে সংঘটিত হয় দুৰ্ঘটনাটো ৷ পথ অতিক্ৰম কৰাৰ সময়তে তীব্ৰবেগী বাছখনে মহতিয়াই নিয়ে দিগন্ত বৰাক (Road accident in Hyderabad) ৷ ফলত অতি গুৰুতৰভাৱে আহত হয় প্ৰশিক্ষকগৰাকী ৷ দুৰ্ঘটনাৰ পাচতেই ততাতৈয়াকৈ দিগন্ত বৰাক চিকিৎসালয়লৈ লৈ যোৱা হৈছিল যদিও তেওঁক মৃত ঘোষণা কৰে ৷