ডিব্ৰুগড়, 6 আগষ্ট : সমাগত লোকসভা আৰু পঞ্চায়ত নিৰ্বাচনক লৈ শাসক দল বিজেপিৰ লগতে তৎপৰতা বৃদ্ধি কৰিছে আন আন ৰাজনৈতিক দলসমূহেও ৷ প্ৰত্যেকটো দলে দলৰ সাংগঠনিক ভেটি শক্তিশালী কৰিবলৈ উঠি-পৰি লগাৰ সমান্তৰালকৈ দলৰ সদস্য ভৰ্তিতো মনোনিৱেশ কৰিছে ৷ আন আন দলৰ সমান্তৰালভাৱে আম আদমী পাৰ্টীয়েও অসমত দলীয় ভেঁটি শক্তিশালী কৰিবলৈ চেষ্টা অব্যাহত ৰাখিছে ৷
দেওবাৰে ডিব্ৰুগড়ত অনুষ্ঠিত হৈ যায় আম আদমী পাৰ্টীৰ ৰাজ্যিক কাৰ্যনিৰ্বাহক সভা ৷ ডিব্ৰুগড় চহৰৰ নালিয়াপুলস্থিত গ’ল্ডেন হোটেলত আপৰ ৰাজ্যিক সমন্বয়ক ডাঃ ভৱেন চৌধুৰীৰ সভাপতিত্বত অনুষ্ঠিত হোৱা এই ৰাজ্যিক কাৰ্যনিবাহকত বহুকেইটা গুৰুত্বপূৰ্ণ বিষয় আলোচনা কৰাৰ কথা জানিবলৈ দিয়ে ৷ কাৰ্যনিৰ্বাহকৰ পাচতে আপৰ ৰাজ্যিক সমিতিয়ে অনুষ্ঠিত কৰে এখন গুৰুত্বপূৰ্ণ সংবাদমেল ৷
বিশেষকৈ আগন্তক লোকসভা আৰু পঞ্চায়ত নিৰ্বাচনৰ ৰণকৌশল আৰু নিৰ্বাচনৰ পূৰ্বে দলটোৰ সাংগঠনিক ভেঁটি শক্তিশালী কৰা সন্দৰ্ভত আলোচনা কৰা বুলি সংবাদমেলত জানিবলৈ দিয়ে আপৰ ৰাজ্যিক নেতৃত্বই ৷ লোকসভা নিৰ্বাচনৰ বাবে ডিব্ৰুগড় আৰু যোৰহাট লোকসভা সমষ্টিত আম আদমী পাৰ্টীয়ে শক্তিশালী ভাৱে কাম কৰি থকা বুলি জানিবলৈ দিয়ে ৷ কেন্দ্ৰত আপে বিৰোধী ঐক্য ‘ইণ্ডিয়া’ৰ অংশীদাৰ হ'লেও পঞ্চায়ত নিৰ্বাচন এককভাৱে খেলিব বুলি সংবাদমেলত ঘোষণা কৰে আপৰ ৰাজ্যিক নেতৃত্বই ৷
