মৰাণ, ২৮ মে': ২০১৯ চনতেই মাহমৰা বিধানসভা সমষ্টিৰ অন্তৰ্গত ডিপ্লিং চাহ বাগিচাত প্ৰাথমিক স্বাস্থ্য কেন্দ্ৰৰ আধাৰশিলা স্থাপন কৰা হৈছিল । এক কোটিৰো অধিক টকা ব্যয় সাপেক্ষে নিৰ্মাণ হোৱা স্বাস্থ্য কেন্দ্ৰৰ লগতে চিকিৎসক আৰু পৰিচাৰিকাৰ আৱাসগৃহ ।
কিন্তু অতি পৰিতাপৰ বিষয় যে নিৰ্বাচনৰ পূৰ্বে মাহমৰা সমষ্টিৰ বিধায়ক যোগেন মহনে ৰাইজৰ বাবে মুকলি কৰা হ'ব বুলি ঘোষণা কৰিছিল । কিন্তু আজিলৈকে মুকলি কৰি দিয়া নহ'ল নিৰ্মাণ সম্পূৰ্ণ হোৱা চিকিৎসা কেন্দ্ৰটো ।
আনহাতে, শেহতীয়াকৈ বাগিচাখনৰ এগৰাকী শ্ৰমিক ক'ভিডত আক্ৰান্ত হৈ মৃত্যু হোৱাৰ পাচতে অতিশীঘ্ৰে স্বাস্থ্য কেন্দ্ৰটো মুকলি কৰি দিয়াৰ লগতে চিকিৎসক, স্বাস্থ্য কৰ্মী নিয়োগ কৰাৰ উপৰিও চিকিৎসাৰ ক্ষেত্ৰত প্ৰয়োজনীয় সা-সুবিধা প্ৰদান কৰিবলৈ দাবী উত্থাপন কৰিছে বাগিচাবাসীয়ে ।
উল্লেখ্য যে, মাহমৰা বিধানসভা সমষ্টিৰ অন্তৰ্গত ডিপ্লিং চাহ বাগিচাত নিৰ্মাণ কৰা প্ৰাথমিক স্বাস্থ্য কেন্দ্ৰটো আজিলৈকে মুকলি নকৰাত অসন্তুষ্টি প্ৰকাশ কৰিছে বাগিচাখনৰ শ্ৰমিকসকলে । মাহমৰা বিধানসভা সমষ্টিৰ অন্তৰ্গত বৃহত্তৰ কাকতিবাৰী তথা ইয়াৰ দাঁতিকাষৰীয়া অঞ্চলক সামৰি এখন চিকিৎসালয় নিৰ্মাণ কৰিবলৈ ৰাইজে দীৰ্ঘদিন ধৰি চৰকাৰক আহ্বান জনাই আহিছিল ।
ইয়াৰ পৰিপ্ৰেক্ষিততে ৰাষ্ট্ৰীয় স্বাস্থ্য অভিযানৰ অধীনত মাহমৰাৰ ডিপ্লিং চাহ বাগিচাত এটা প্ৰাথমিক স্বাস্থ্য কেন্দ্ৰৰ লগতে চিকিৎসক আৰু পৰিচাৰিকাৰ আৱাসগৃহ নিৰ্মাণৰ আঁচনি গ্ৰহণ কৰিছিল চৰকাৰে । সেই অনুসৰি, ৰাজ্য সভাৰ সাংসদ কামাখ্যা প্ৰসাদ তাছাই যোৰহাট লোকসভা সমষ্টিৰ সাংসদ তপন কুমাৰ গগৈ, মাহমৰা সমষ্টিৰ বিধায়ক যোগেন মহন, অসম চাহ নিগমৰ অধ্যক্ষ অমিয় কুমাৰ বৰাৰ উপস্থিতিত ২০১৯ বৰ্ষৰ ৬ অক্টোবৰত আধাৰশিলা স্থাপন কৰিছিল ।
লগতে পঢ়ক: বেঁকী নৈৰ গৰাখহনীয়া পৰিৰ্দশন উপায়ুক্ত আয়ুস গাৰ্গৰ
