মৰাণ,৬ মে': উন্নয়নৰ শ্লোগানেৰে শাসনৰ গাদীত বহা হিমন্ত বিশ্ব শৰ্মা নেতৃত্বাধীন বিজেপি চৰকাৰৰ এবছৰ পূৰ্ণ হ'বৰ হ'ল । কিন্তু, এতিয়াও উন্নয়নৰ মুখ দেখা নাই ৰাজ্যৰ ভিন্ন প্ৰান্তৰ ৰাইজে । আনতো বাদেই মন্ত্ৰীৰ সমষ্টিতেই এখন দলঙৰ বাবে হাঁহাকাৰ ৰাইজৰ ।
এতিয়া দলং বিচাৰি প্ৰতিবাদত নামিল বিমল বৰাৰ সমষ্টিৰ এটা অঞ্চলৰ ৰাইজ(Protest demanding a bridge in Tingkhang) । ডিব্ৰুগড় জিলাৰ টিংখাং সমষ্টিৰ মৰাণৰ হালমাৰী চাহ বাগিচাৰ কাষতে থকা দুটা অঞ্চল ৰাধা গ্ৰাণ্ট আৰু জংঘল লাইনৰ ৰাইজে আজিও বাঁহৰ সাঁকোৰে যাতায়ত কৰিব লগা হৈছে ।
ডিমৌ নদীৰ ওপৰত এখন দলং নথকাত বৃহৎ অঞ্চল দুটাৰ ৰাইজে অনেক কষ্টৰে বিপদ সংকুলভাৱে পাৰ হ'ব লগা হয় নদীখন(No bridge over Dimou river) । এই পৰ্যন্ত বাঁহৰ সাঁকোৰ পৰা পৰি কেইবাজনো লোক আঘাতপ্ৰাপ্তও হ'ব লগা হৈছে । নদীখন পাৰ হৈ স্কুল-কলেজৰ ছাত্ৰ-ছাত্ৰী, শ্ৰমিক আৰু তিনঠেঙীয়া পঞ্চায়তলৈ লোকসকলে অহা-যোৱা কৰে ।
ৰাইজে নিজা প্ৰচেষ্টাৰে দুডালমান বাঁহ পাৰি সাঁকো নিৰ্মাণ কৰি লৈছে যদিও নদীৰ পানী বাঢ়ি আহিলে বিপদ জনক হৈ পৰে যাতায়ত । ৰাইজে পঞ্চায়ত প্ৰতিনিধিক বাৰম্বাৰ আবেদন নিবেদন কৰিছে যদিও কোনো গুৰুত্ব নাই বিষয়টোক লৈ ।
যাৰ বাবে দুয়োটা অঞ্চলৰ ৰাইজ স্বতঃস্ফূৰ্ত ভাৱে ওলাই আহি নদীখনৰ পাৰতে "আমাক দলং লাগে" দাবীৰে শ্ল'গান দিয়ে । টিংখাং সমষ্টিৰ অতি ভিতৰুৱা এই অঞ্চল দুটাৰ ৰাইজৰ আহ্বানৰ প্ৰতি স্থানীয় বিধায়ক তথা ৰাজ্যৰ কেবিনেট মন্ত্ৰী বিমল বড়াই কেনেধৰণৰ সঁহাৰি দিয়ে সেয়া হ’ব লক্ষণীয় ।
লগতে পঢ়ক: প্ৰাক্তন বিধায়ক তথা বৰপেটা জিলা কংগ্ৰেছৰ সভাপতি আব্দুৰ ৰহিম খানৰ কংগ্ৰেছ ত্যাগ