মৰাণ,26 মে’: ৰাজ্যত বৰ্তমানেও শাম কটা নাই ক’ভিড মহামাৰীৰ আতংকময় পৰিস্থিতি ৷ এইক্ষেত্ৰত সৰ্বাধিক আক্ৰান্তৰ হাৰেৰে শীৰ্ষস্থান দখল কৰিছে কামৰূপ(ম) জিলাই ৷ আক্ৰান্তৰ সংখ্যা দৈনিক বৃদ্ধি পোৱাত জিলাখনৰ কেইবাটাও স্থানক কণ্টেইনমেন্ট জ'ন হিচাপে ঘোষণা কৰিছে স্বাস্থ্য বিভাগে ৷ আনহাতে, ৰাজ্যৰ ক’ভিড 19 ৰ সংক্ৰমণ হোৱা জিলাসমূহৰ ভিতৰত দ্বিতীয় স্থানত আছে ডিব্ৰুগড় জিলা ৷ ইতিমধ্যে চৰকাৰে কোৱাৰেণ্টাইনত থকা পৰিয়ালসমূহক সাহায্য আগবঢ়োৱাৰ কথা ঘোষণা কৰিছিল যদিও অধিকাংশ অঞ্চলতে আজিও পৰ্যাপ্ত সামগ্ৰী যোগান ধৰিব পৰা নাই ৷
নামৰূপৰ ভিন্ন অঞ্চলত কোৱাৰেণ্টাইনত থকা লোকসকলৰ লগতে আৰ্তজনৰ সহায়ৰ বাবে মঙলবাৰে আগবাঢ়ি অহা দেখা যায় অসম জাতীয় পৰিষদৰ সভাপতি লুৰিণজ্যোতি গগৈক ৷ গগৈয়ে নাহৰকটীয়া সমষ্টিৰ অন্তৰ্গত নামৰূপ থাৰ্মেলৰ লাচিত বৰফুকন গাঁও, বিভিএফচিএল চেক্টৰ F, চেক্টৰ C, নিউ কলনী আৰু ১ নং দোৱণীয়া গাঁৱত কোৱাৰেন্টাইনত থকা লোকসকলৰ লগতে আৰ্থিকভাৱে দুৰ্বল পৰিয়ালৰ মাজত খাদ্য সামগ্ৰী বিতৰণ কৰে ৷
উল্লেখ্য যে, বিগত অসম বিধানসভাৰ নিৰ্বাচনত নাহৰকটীয়া আৰু দুলীয়াজান সমষ্টিৰ পৰা প্ৰতিদ্বন্দ্বিতা আগবঢ়াই নিৰ্বাচনী ৰণত পৰাজয় স্বীকাৰ কৰা লুৰিণজ্যোতি গগৈৰ এনে পদক্ষেপক অধিকাংশ লোকে প্ৰশংসা কৰিছে ৷ ভোটযুদ্ধত জয় লাভ কৰিব নোৱাৰিলেও কল্যাণমূলক কামেৰে সাধাৰণ লোকৰ মন জয় কৰাৰ চেষ্টাত অৱতীৰ্ণ হৈছে নৱগঠিত ৰাজনৈতিক দলটোৰ সভাপতিগৰাকীয়ে ৷
সমষ্টিটোৰ বৰ্তমানৰ বিধায়ক তৰংগ গগৈ এই সময়ত ৰাইজৰ কাষত উপস্থিত নথকাৰ বিপৰীতে এজেপিৰ সভাপতি গৰাকী সমষ্টিবাসীৰ কাষত থিয় হোৱা বিষয়টোৱে বিশেষ তাৎপৰ্য বহন কৰিছে ৷ বিগত নিৰ্বাচনত নিৰ্বাচনী বৈতৰণী পাৰ হ’ব নোৱাৰা লুৰিণজ্যোতি গগৈৰ এনে পদক্ষেপে পৰৱৰ্তী সময়ত গগৈক সাধাৰণ ৰাইজৰ কাষ চপাই অনাতো একপ্ৰকাৰ নিশ্চিত বুলি মন্তব্য কৰিছে একাংশ লোকে ৷
লগতে চাওকঃ উত্তৰ-পূৱতো পৰিব ঘূৰ্ণীবতাহ য়াছৰ প্ৰভাৱ
