মৰাণ, 13 অক্টোবৰ : ক্ৰমাৎ মৃত্যুৰ দিশে গতি কৰিছে জকাই অৰ্কিড উদ্যান আৰু পৰিৱেশ পৰ্যটন কেন্দ্ৰ ৷ পৰ্যটকক আকৰ্ষণ কৰিব পৰাকৈ উদ্যানখনত গঢ়ি তোলা নাই কোনো বিশেষ ব্যৱস্থা । 2004 চনতে প্ৰয়াত প্ৰাক্তন মুখ্যমন্ত্ৰী তৰুণ গগৈ(Tarun Gogoi)য়ে আধাৰশিলা স্থাপন কৰিছিল বিভিন্ন প্ৰজাতিৰ উদ্ভিদ আৰু প্ৰাণীৰে ভৰপূৰ জকাই অৰ্কিড উদ্যান(Jokai Orchid Garden)খনৰ ৷
বিগত বৰ্ষত উদ্যানখনৰ আন্তঃগাঁথনি সবলীকৰণৰ বাবে ৰাজ্য চৰকাৰে প্ৰায় 44 লাখ টকা পুঁজিৰ আৱণ্টন দিছিল যদিও সেই পুঁজি ক’ত ব্যৱহাৰ হ’ল সেয়া বৰ্তমানেও ৰহস্যজনক হৈ আছে ৷ ক’ভিড 19(Covid 19) মহামাৰীৰ বাবে দীৰ্ঘদিন ধৰি উদ্যানখন বন্ধ হৈ থকা বুলি কৰ্তৃপক্ষই দাবী কৰিব বিচাৰিলেও পৰ্যটকক আকৰ্ষণ কৰিব পৰাকৈ উদ্যানখনত কোনো ব্যৱস্থা কৰা হোৱা নাই ।
ইফালে স্থানীয় ৰাইজৰ অভিযোগ অনুসৰি, বন বিভাগ(Forest Department) আৰু কিছু অসাধু ব্যক্তিয়ে মিলি বনাঞ্চলখনৰ সকলো মূল্যবান গছ-গছনি কাটি তহিলং কৰিছে । এই উদ্যানখনত অৰ্কিড সংৰক্ষণৰ নামত ভেকো-ভাওনাৰহে সৃষ্টি হৈছে । লক্ষাধিক টকা ব্যয় সাপেক্ষে স্থাপন কৰা উদ্যানখনত বৰ্তমান শূন্য আন্তঃগাঁথনি ।
বন বিভাগ আৰু পৰ্যটন বিভাগ(Tourism Department)ৰ চৰম দায়িত্বজ্ঞানহীনতাৰ বাবে ডিব্ৰুগড়ৰ পাঁচখন সুৰক্ষিত বনাঞ্চলৰ অন্যতম সংৰক্ষিত বনাঞ্চল জকাই সংৰক্ষিত বনাঞ্চল(Jokai Reserve Forest)খন দুৰৱস্থা হোৱা বুলি স্থানীয় ৰাইজে অভিযোগ উত্থাপন কৰিছে ৷ ৰাজ্যৰ পৰ্যটন বিভাগৰ মন্ত্ৰী বিমল বৰা(Bimal Bora)ৰ গৃহ জিলাত অৱস্থিত এই উদ্যানখন যিধৰণে গুৰুত্ব দিব লাগিছিল, সেইধৰণে বন বিভাগে কোনো গুৰুত্ব নিদিয়া বুলি ক্ষোভ উজাৰিছে ৰাইজে ।
তথ্য অনুসৰি জকাই সংৰক্ষিত বনাঞ্চলত শতাধিক প্ৰজাতিৰ পখিলা, সোণালী বান্দৰ, বাঘ, কেইবাটাও প্ৰজাতিৰ অৰ্কিড, বনৌষধিকে ধৰি আছে বহু আপুৰুগীয়া গছ-গছনি আছে । জিলাখনৰ এই বিশেষ উদ্যানখন শীঘ্ৰেই মৃত্যুৰ মুখৰ পৰা উভতাই আনি পৰ্যটকৰ আকৰ্ষণৰ কেন্দ্ৰবিন্দু কৰি তুলিবলৈ ৰাজ্য চৰকাৰক আহ্বান জনাইছে স্থানীয় ৰাইজে ৷
লগতে পঢ়ক : হোজাইত চোৰাং তেলৰ বিৰুদ্ধে আৰক্ষীৰ অভিযান
