ডিব্ৰুগড়, 9 মে': কিছুদিন পূৰ্বে চ'ছিয়েল মিডিয়াত ভাইৰেল হৈ পৰা এগৰাকী যুৱতী । এখন চাইকেলত শাক-পাচলি বিক্ৰীৰ ফটো আৰু ভিডিঅ' আপলোডেৰে ভাইৰেল হৈ পৰিছিল জানমনি নামৰ যুৱতী গৰাকী । আনকি অসমৰ প্ৰসিদ্ধ ব্যক্তি, অভিনেত্ৰী আদি ভিন্ন লোকেও শ্বেয়াৰ কৰিছিল জানমনিৰ কণ্টকময় জীৱনৰ ভাইৰেল ভিডিঅ' আৰু ফটো । ডিব্ৰুগড়ৰ জামিৰাৰ সাপেখাতী ঘগৰা গাঁৱৰ জানমনিয়ে দৈনিক, চাইকেলত দুফালে শাক পাচলিৰ গধূৰ মোনা কঢ়িয়াই দুটকা উপাৰ্জনৰ আশাৰে ওলাই যায় ।
প্ৰায় 18 বছৰেই হ'ল জানমনিৰ পিতৃয়ে খোজ কাঢ়িব নোৱাৰাৰ । যাৰ বাবে জানমনি সৰু থকাৰে পৰা নিয়মীয়াকৈ ৰ'দ-বৰষুণকো নেওচি অবিৰত সংগ্ৰাম কৰি অহা মাতৃ মনোমতী গগৈয়ে, নিষ্ঠুৰ বাস্তৱ সুঁৱৰি উচুপি উঠিছিল ইটিভি ভাৰতৰ সাংবাদিকৰ আগত । অভাৱৰ বাবে উচ্চতৰ মাধ্যমিক পৰীক্ষাত উত্তীৰ্ণ হৈয়ো পৰৱৰ্তী শিক্ষাৰ আশাক মোহাৰি পেলালে জানমনিয়ে ।
মাতৃৰ অসহায় অৱস্থা সহ্য কৰিব নোৱাৰি শিক্ষাজীৱন আধাতো সামৰি, প্ৰায় 30 কিলোমিটাৰ চাইকেল চলাই বজাৰত শাক-পাচলি বিক্ৰী কৰি মাতৃক সহায়ৰ বাবে সাজু হ'ল জানমনি । কিন্তু লক্ ডাউনে সেই উপাৰ্জনৰ পথো যেন স্তব্ধ কৰিছিল তাইৰ । সেয়ে শয্যাশায়ী পিতৃৰ চিকিৎসাৰ লগতে ঘৰৰ খৰচ উলিয়াবলৈ আজিকালি, গাঁৱৰ ভিতৰত চাইকেলেৰে পাচলি বেচিবলৈ ওলাই যায় জানমনি । কেতিয়াবা যদি এপইচা-দুপইচা পায়, কেতিয়াবা আকৌ খালী হাতেৰে ঘূৰি আহে তাই ।
উল্লেখ্য যে, প্ৰায় 18 বছৰীয়া এই অসহায় যুৱতী গৰাকীক ইতিমধ্যে ভিন্নজনে সহায়ৰ বাবে আগবাঢ়ি অহাৰ কথা প্ৰকাশ কৰিছে চ'ছিয়েল মিডিয়াযোগে । নিজ গৃহ জিলাৰ এই অসহায় পৰিয়ালটোক সহায়ৰ ক্ষেত্ৰত নিশ্চয় পিচ পৰি নাথাকিব মুখ্যমন্ত্ৰীও । সেই আশাৰেই যেন এতিয়া বাট ৰৈছে অসহায় পৰিয়ালটোৱে ।
লগতে পঢ়কঃ লক্ ডাউনৰ সময়ত তীব্ৰ খাদ্য সংকটত ভুগিছে নলবাৰীৰ এটা পৰিয়াল
