ডিব্ৰুগড়, ২৭ ডিচেম্বৰ: টাটা ন্যাস আৰু অসম চৰকাৰৰ যুটীয়া সহযোগত স্থাপন কৰা অসম কেন্সাৰ কেয়াৰ ফাউণ্ডেশ্যনৰ ডিব্ৰুগড় কাৰ্যালয়ৰ উদ্যোগত শনিবাৰে নাহৰকটীয়াত কেন্সাৰ সজাগতাৰ এখনি সভা অনুষ্ঠিত হৈ যায় । নাহৰকটীয়াৰ স্থানীয় যুৱক তথা কেন্সাৰ কেয়াৰ ফাউণ্ডেচনৰ কম্পিউটাৰ তথ্য সহায়ক হ্তিন সোণোৱালৰ প্ৰচেষ্টাত এই সভাখন অনুষ্ঠিত হয় । সভাখনত সংস্থাটোৰ জিলা স্বাস্থ্য প্ৰৱন্ধক নিধি দাস আৰু হেল্থ কেয়াৰ মেনেজাৰ অভিজিৎ ভট্টাচাৰ্যই ধঁপাতজনিত কেন্সাৰ ৰোগে কেনেকৈ বৰ্তমান সমাজক ছানি ধৰিছে তাৰ ওপৰত তথ্যগত উপস্থাপন কৰে ।
ইফালে অসম কেন্সাৰ কেয়াৰ ফাউণ্ডেশ্যনৰ উদ্যোগত ডিব্ৰুগড়ৰ অসম চিকিৎসা মহাবিদ্যালয় হস্পিতালৰ চৌহদত "সুস্থ অসম" নামৰ কেন্সাৰ চিনাক্তকৰণৰ এটি গোট স্থাপন কৰা হৈছে বুলি সংস্থাটোৰ তৰফৰ পৰা ব্যক্ত কৰা হয় । আৰম্ভণিৰে পৰা এই পৰ্যন্ত উক্ত গোটত ৩০ ৰ পৰা ৬৫ বছৰ বয়সৰ তিনি সহস্ৰাধিক পুৰুষ-মহিলাৰ বিনামূলীয়া পৰীক্ষা সম্পন্ন হোৱা বুলি তেওঁলোকে জানিবলৈ দিয়ে । পৰীক্ষা সম্পন্ন হোৱা সকলৰ ভিতৰত ছয় গৰাকী কেন্সাৰ আক্ৰান্ত ৰোগীৰ সন্ধান পোৱা গৈছে । সম্প্ৰতি আক্ৰান্ত কেইজনৰ চিকিৎসা প্ৰক্ৰিয়া চলি আছে বুলি সংস্থাটোৱে উল্লেখ কৰে ।
অসম কেন্সাৰ কেয়াৰ ফাউণ্ডেচনৰ তৰফৰ পৰা কেন্সাৰ ৰোগ সম্পৰ্কে জানিবলৈ ১৮০০-৩৪৫-৪৩২৫ আৰু ধঁপাত সেৱনৰ দৰে অভ্যাস পৰিত্যাগ কৰিবলৈ পৰামৰ্শৰ বাবে ১৮০০-১১২-৩৫৬ বিনা শুল্ক ফোন নাম্বাৰত আগ্ৰহী সকলক যোগাযোগ কৰিবলৈকো আহ্বান জনাইছে ।
উল্লেখ্য যে প্ৰাৰম্ভিক অৱস্থাত কেন্সাৰ ৰোগ চিনাক্ত কৰিব পাৰিলে ৯০ শতাংশ ৰোগীয়ে আৰোগ্য লাভ কৰিব পৰাৰ সম্ভাৱনা প্ৰৱল । এই ক্ষেত্ৰত সজাগতা আনিবলৈ সংস্থাটোৰ তৰফৰ পৰা আহ্বান জনায় ।
লগতে পঢ়ক: চিতাৰ জুইত বিলীন শ্বহীদ মৃত্যুঞ্জয় চুতীয়াৰ নিথৰ দেহ
