মৰাণ, 17 এপ্ৰিল : ৰঙালী বিহুৰ আনন্দৰ মাজতে গৰু বিহুৰ দিনা বিশ্বনাথৰ ঘিলাধাৰী নৈত আৰু ডিব্ৰুগড়ৰ লেজাই বাঁহবাৰীত কেইবাজনো যুৱক-যুৱতীৰ সলিল সমাধি ঘটা ঘটনাত শোক প্ৰকাশ কৰিছে কেন্দ্ৰীয় মন্ত্ৰী ৰামেশ্বৰ তেলীয়ে ৷ উল্লেখ্য যে, বিশ্বনাথৰ ঘিলাধাৰী নৈত গৰু বিহুৰ দিনা চতীয়া পুৰণি গাঁৱৰ ভাৰ্গৱ মন্ত্ৰী আৰু অকন্যা মন্ত্ৰী নামৰ দুই ভাতৃ-ভগ্নীৰ সলিল সমাধি ঘটে ৷ পানীৰ সোঁতত উটি যোৱা ভগ্নী অকন্যাক বচাবলৈ গৈ আকাল মৃত্যুক সাৱটি লয় ভাৰ্গৱ মন্ত্ৰীয়ে । ইয়াৰ পিচতে ঘিলাধাৰী নৈত মৌচম ওজা, অভিজৎ ওজা আৰু বিকাশ হাজৰিকা নামৰ আন তিনি বন্ধুৱে গা ধুৱলৈ গৈ মৃত্যুক আঁকোৱালি লয় ।
আনহাতে একেদিনাই ডিব্ৰুগড়ৰ লেজাই বাঁহবাৰীৰ দিহিং নদীত গা ধুবলৈ গৈ মৃত্যুক আকোঁৱালি লয় শিৰোমণি বৰা আৰু চানু খনিকৰ নামৰ আন দুজন যুৱকে ৷ যুৱককেইজনৰ অকাল মৃত্যুত স্বাভাৱিকতে বিশ্বনাথ আৰু ডিব্ৰুগড় জিলাত শোকৰ ছা পৰিছে । যুৱককেইজনৰ আকস্মিক বিয়োগত কেন্দ্ৰীয় মন্ত্ৰী তথা ডিব্ৰুগড়ৰ সাংসদ ৰামেশ্বৰ তেলীয়ে গভীৰ শোক প্ৰকাশ কৰাৰ লগতে আটাইকেইগৰাকী মৃতকৰ আত্মাৰ চিৰশান্তি কামনা কৰি শোকসন্তপ্ত পৰিয়াললৈ গভীৰ সমবেদনা জ্ঞাপন কৰিছে ।
লগতে পঢ়ক : হোটেল কিৰণশ্ৰী গ্ৰেণ্ডত কিহৰ বৈঠক কংগ্ৰেছ নেতৃত্বৰ ?
