ডিব্ৰুগড়, 9 ছেপ্টেম্বৰ: বহিঃৰাজ্যৰ পৰা আমদানিকৃত মাছত ফ’ৰমেলিনৰ লগতে স্বাস্থ্যৰ বাবে ক্ষতিকাৰত বিভিন্ন দ্ৰব্যৰ উপস্থিতি ধৰা পৰাৰ পাছতেই ৰাজ্য চৰকাৰে তেনে মাছ অসমলৈ অনাত নিষেধাজ্ঞা জাৰি কৰিছিল ৷ চৰকাৰৰ তৎপৰতাত কিছুদিনৰ বাবে অসমলৈ বন্ধ হৈছিল বহিঃৰাজ্যৰ মাছৰ সৰবৰাহ ৷
চৰকাৰৰ এই সিদ্ধান্তৰ পাছতেই থলুৱা মাছ ব্যৱসায়ীসকলে কিছু আশাৰ ৰেঙণি দেখা পাইছিল ৷ কিন্তু আকৌ ৰাজ্যত জনস্বাস্থ্যৰ প্ৰতি ভাবুকি কঢ়িয়াই সংগোপনে আৰম্ভ হৈছে চালানি মাছৰ সৰবৰাহ আৰু বিক্ৰী ৷ একাংশ দুষ্ট চক্ৰই ৰাজ্যৰ বিভিন্ন জিলাত চালানি মাছ বিক্ৰী কৰি সাধাৰণ ৰাইজৰ বিপদৰ মাজলৈ ঠেলি দিয়াৰ লগতে থলুৱা মাছ ব্যৱসায়ীসকলৰ মৃত্যু ঘণ্টা বজাইছে ৷
এই অসাধু চক্ৰটোৰ বাবে এতিয়া থলুৱা মাছৰ বজাৰ বন্ধ হোৱাৰ উপক্ৰম হৈছে ৷ ডিব্ৰুগড় এই চক্ৰটোৱে এতিয়া উজনি অসমৰ চেঁচা নদীৰ অতি সোৱাদযুক্ত মাছ বিষাক্ত বুলি অপপ্ৰচাৰ চলাই থলুৱা মাছৰ বজাৰখন শেষ কৰাৰ ষড়যন্ত্ৰত লিপ্ত হৈছে ৷ যাৰ বাবে চেঁচা নদীৰ মাছ বিক্ৰী পৰিয়াল চলাই থকাসকলৰ মাজত এতিয়া হাহাকাৰ পৰিৱেশ সৃষ্টি হৈছে ।
এই দুষ্ট চক্ৰটোৱে উজনীৰ বহু কেইখন জিলাৰ 80 শতাংশ থলুৱা মাছৰ বজাৰ দখল কৰা ডিব্ৰুগড়ৰ চেঁচা নদীৰ মাছ বিক্ৰীত বাধা প্ৰদান কৰিছে ৷ ফলত লখিমপুৰ, জোনাই চিলাপথাৰ, ধেমাজী, তিনিচুকীয়াৰ লগতে ডিব্ৰুগড়ৰ বহু কেইখন বজাৰত থলুৱা মাছৰ বিক্ৰী অস্বাভাৱিকভাৱে হ্ৰাস পাইছে ৷
মুখ্যতঃ উজনি অসমত বজাৰ দখল কৰিবলৈ সক্ষম হোৱা চেঁচা নদীৰ মাছ বিষাক্ত বুলি অপপ্ৰচাৰ চলাই কিছু লোকে পুনৰ উজনিৰ বজাৰত কানপুৰীয়া, নাগপুৰীয়া মাছৰ ব্যৱসায় আৰম্ভ কৰা বাবে এই কু-অভিসন্ধি আৰম্ভ কৰা বুলি অভিযোগ উত্থাপন হৈছে ৷
উল্লেখ যে ডিব্ৰুগড়ৰ পশ্চিম ৰাজহ চক্ৰৰ অন্তৰ্গত লেজাই, কলাখোৱা অঞ্চলৰ 19 খনকৈ গাঁৱৰ ৰাইজৰ জীৱিকাৰ প্ৰধান পথ চেঁচা, দিহিং, ব্ৰহ্মপুত্ৰ নদীৰ মাছ ধৰি বিক্ৰী কৰা । বিগত বহু বৰ্ষৰ পূৰ্বৰ পৰাই অঞ্চলকেইটাৰ নদী কাষৰীয়া সৰ্বসাধৰণৰ ৰাইজে নদীখনকে নিজৰ জীৱন জীৱিকা হিচাবে লৈ মাছ বিক্ৰী কৰি আহিছে । কিয়নো অঞ্চলটোত প্ৰতিবছৰে বান আহি খেতি নষ্ট কৰে, সেয়ে বহু লোকে কৃষি কৰাৰ পৰা আঁতৰি থাকে ।
প্ৰতিদিনে মাজ ৰাতিৰ পৰা কাহিলি পুৱালৈ চেঁচা নদীত মাছ ধৰি স্থানীয় ডাকত বিক্ৰী কৰি পৰিয়াল পোহপাল দিয়া এই মানুহখিনিৰ অৱস্থা এতিয়া শোচনীয় হৈ পৰিছে । কাৰণ চেঁচা নদীৰ মাছ বিষাক্ত বুলি অপপ্ৰচাৰ চলাই বিভিন্ন স্থানত বাধা দিয়া হৈছে চেঁচা নদীৰ মাছ বিক্ৰীত । সেয়ে জিলা প্ৰশাসন আৰু চৰকাৰক এই ক্ষেত্ৰত ব্যৱস্থা গ্ৰহণ কৰিবলৈ আহ্বান জনাইছে ডিব্ৰুগড়ৰ এই বৃহত্তৰ অঞ্চলৰ ৰাইজে ।
