মৰাণ,19 আগষ্ট: “প্ৰকৃতিক অত্যাচাৰ কৰাৰ প্ৰতিফল মানুহে হাতে হাতে পাইছে ৷ গোলকীয় উষ্ণতাই আমাক জ্বলাই মাৰিছে । মানুহে নিজেই নিজকে জীৱশ্ৰেষ্ঠ বুলি দাবী কৰিছে, কিন্তু প্ৰাকৃতিক পৰিৱেশ ধ্বংস কৰি মানুহে আচলতে জীৱশ্ৰেষ্ঠ বুলি কোৱাৰ অধিকাৰ হেৰুৱাই পেলাইছে” ৷ সোমবাৰে মৰাণৰ সমীপৰ বতামৰা জাতীয় বিদ্যালয়ত বিদ্যালয়খনৰ প্ৰতিষ্ঠাপক অধ্যক্ষ স্বপ্নদ্ৰষ্টা যতীন গগৈৰ তৃতীয় মৃত্যুবাৰ্ষিকীত আয়োজিত চতুৰ্থ স্মাৰক বক্তৃতানুষ্ঠানত মুখ্য বক্তা হিচাপে উপস্থিত থাকি এই মন্তব্য অৰণ্য মানৱ,পদ্মশ্ৰী যাদৱ পায়েঙৰ ৷
‘‘প্ৰকৃতি সংৰক্ষণ আৰু মানৱ জাতিৰ ভৱিষ্যত’’ শীৰ্ষক বিষয়ত বক্তৃতা প্ৰদান কৰি পায়েঙে পৰিৱেশ দিৱস পতাৰ নামত বছৰি একেটা গাঁততে গছ পুলি ৰোপন কৰা বুলি কৈ পৰিৱেশ সুৰক্ষাৰ ক্ষেত্ৰত যে আজিও এচামে ভেকোভাওনা কৰি আছে তাক লৈ গভীৰ উদ্বেগ প্ৰকাশ কৰে ৷ লগতে জনজীৱন আৰু প্ৰকৃতিলৈ ভাবুকি কঢ়িয়াই অনা বৃহৎ নদীবান্ধৰ ক্ষেত্ৰত চৰকাৰে দুমুখীয়া স্থিতি গ্ৰহণ কৰি আহিছে বুলি উল্লেখ কৰিল ক্ষোভ উজাৰে অৰণ্য মানৱ গৰাকীয়ে ৷ নিজৰ ভাষণৰ মাজতে ছাত্ৰ ছাত্ৰী আৰু শিক্ষক সকলক জন্মদিনত কেক কটাৰ সলনি একোটাকৈ গছ ৰুলি ৰোপন কৰিবলৈ বুলি আহ্বান জনায় যাদৱ পায়েঙে ৷
উল্লেখ্য যে এই বক্ততৃতা অনুষ্ঠানৰ লগত সংংগতি ৰাখি বিদ্যালয়ৰ প্ৰাচীৰ পত্ৰিকা কৰণিৰ পঞ্চম সংখ্যা উন্মোচন কৰে পদ্মশ্ৰী যাদৱ পায়েঙে । প্ৰায় তিনিশতাধিক লোকৰ সমাগমেৰে পূৰ্ণ অনুষ্ঠানটিত উপস্থিত থাকে বিশিষ্ট পৰিৱেশ কৰ্মী, ধনেশ পক্ষীৰ সংৰক্ষক ভৰত বৰা, কনকলতা উচ্চ মাধ্যমিক বিদ্যালয়ৰ অধ্যক্ষ, বুৰঞ্জীবিদ বীৰেন্দ্ৰ কুমাৰ গগৈ, মৰাণ বাণিজ্য মহাবিদ্যালয়ৰ প্ৰাক্তন অধ্যক্ষ মনোৰঞ্জন শৰ্মা, বিশ্ৰামপুৰ জাতীয় বিদ্যালয়ৰ অধ্যক্ষ অচিন্ত্য লুখুৰাখন, ধনেশ পক্ষী সুৰক্ষা সমিতিৰ সম্পাদক মোহন গগৈ আদিকে ধৰি ভালেসংখ্যক শিক্ষক, সমাজকৰ্মী, আৰু পৰিৱেশকৰ্মী ৷
