ডিব্ৰুগড়,14 এপ্ৰিলঃ ডিব্ৰুগড়ত পাৰিবাৰিক কন্দলৰ ফলত সংঘটিত হয় ভয়াৱহ অগ্নিকাণ্ড ৷ জিলাখনৰ চাউলউখোৱাত সোমবাৰে নিশা সংঘটিত হয় এই অগ্নিকাণ্ডৰ ঘটনা ৷ স্থানীয় লোকৰ ভাষ্য অনুসৰি, সোমবাৰে নিশা প্ৰায় 9.10 বজাত চাউলউখোৱাৰ ঘৰবন্দী চুকৰ ছেলিম শ্বাহ নামৰ লোকজনে কোনো বিষয়ত পত্নীৰ সৈতে কাজিয়াত লিপ্ত হয় ৷ স্থানীয় লোকে কেইবাবাৰো এই কাজিয়া ভাঙিবলৈ চেষ্টা কৰিও বিফল হয় । কাজিয়াৰ মাজতে ছেলিমে পত্নী মঞ্জুমা বেগম আৰু কন্যা সন্তানটিক মাৰধৰ কৰি জ্বলাই দিয়াৰ চেষ্টা কৰে ৷
অৱশেষত নিশা প্ৰায় 12.30 বজাত পত্নী আৰু সন্তানক ঘৰত বন্দী কৰি অগ্নিসংযোগ কৰাৰ চেষ্টা চলাই ছেলিমে ৷ প্ৰাণৰ মমতাত পত্নী আৰু সন্তানটিয়ে ঘৰৰ পৰা পলাই কথমপি প্ৰাণৰক্ষা কৰি উপস্থিত হয় গাভৰু পথাৰ আৰক্ষী চকীত ৷ পত্নীয়ে এজাহাৰ দাখিল কৰিবলৈ যোৱাৰ সুযোগত স্বামী ছেলিমে জ্বলাই দিয়ে বাসগৃহটো । ঘটনাস্থলীত অগ্নি নিৰ্বাপক বাহিনী উপস্থিত হয় যদিও জুইত জাহ যায় সকলো সামগ্ৰী । অগ্নিকাণ্ডটো সংঘটিত কৰি পলায়ন কৰে ছেলিমে ৷
লগতে চাওকঃ 3 মে' লৈ বৃদ্ধি লক্ ডাউনৰ সময় সীমা !
