ডিব্ৰুগড়, 1 নৱেম্বৰঃ দুখন দাৰে চলিছে এটা কাৰ্যালয় ৷ কাৰ্যালয়টোৰ দায়িত্বত আছে এখন গুৰুত্বপূৰ্ণ অভয়াৰণ্য ৷ ৮০০ বৰ্গ কিলোমিটাৰ সামৰি থকা এখন বৰ্ষাৰণ্যৰ দায়িত্বত আছে ৫ গৰাকী অসহায় লোক ৷ চৰকাৰে তেওঁলোকক গম্ভীৰ দায়িত্ব চম্ভালিবলৈ দিছে মাত্ৰ দুখন দা আৰু দুটা টৰ্ছ ৷ নাই বিদুৎ সংযোগ। নাই বিশুদ্ধ খোৱাপানীৰ ব্যৱস্থা ৷ ২০০৪ চনতে বৰ্ষাৰণ্য হিচাপে ঘোষণা কৰা ডিব্ৰুগড় জিলাৰ দিহিং পাটকাই বৰ্ষাৰণ্যৰ নিৰাপত্তাৰ দায়িত্বত থকা এইসকল বন বিভাগৰ লোকে মাত্ৰ দুটা টৰ্চ লাইট আৰু দুখন দাৰে চলাই নিছে নিজৰ কৰ্তব্য ৷ অস্ত্ৰ শস্ত্ৰৰ কথা বাদেই দিয়ক তেওঁলোকৰ নিজৰ নিৰাপত্তাৰ বাবেও নাই কোনো ধৰণৰ সা সৰঞ্জাম ৷ গভীৰ অৰণ্যত কেৱল দুখন দা লৈয়ে পহৰাৰ দায়িত্ব পালন কৰে এইসকল বনকৰ্নীয়ে ৷
২০০৪ চনতে বৰ্ষাৰণ্য হিচাপে স্বীকৃতি লাভ কৰা এই অভয়াৰণ্য খনত আছে ৪০তকৈ অধিক স্তন্যপায়ী জীৱ, ৩০০ প্ৰজাতিৰ পক্ষী, ৩৫ প্ৰজাতিৰ মাছ, ৪০তকৈ অধিক সৰীসৃপ প্ৰজাতি, ৭টা প্ৰজাতিৰ মেকুৰী, ১৩২ টা প্ৰজাতিৰ পখিলা, ভালুক, বন গাহৰি, হলৌ বান্দৰ আৰু ১০৮টা প্ৰজাতিৰ অৰ্কিড ৷ কিন্তু বন্যপ্ৰাণী সমূহক চোৰাংচিকাৰীৰ হাতৰ পৰা ৰক্ষা কৰিবলৈ বন বিভাগে দিছে মাত্ৰ দুখন দা ৷ যি সময়ত চোৰাং চিকাৰীৰৰ হাতত AK-47ৰ দৰে অত্যাধুনিক মাৰণাস্ত্ৰ আছে সেই সময়ত এইসকল বনকৰ্মীয়ে অতি নিষ্ঠাৰে পুৰণিকলীয়া ব্যৱস্থাৰে নিৰাপত্তা দিব লগা হৈছে অভয়াৰণ্যখনক ৷
লগতে চাওকঃ প্ৰতিবাদত বহিল মধ্যাহ্ন ভোজন কৰ্মী : উত্তাল প্ৰতিবাদ
