ডিব্ৰুগড়, ২৯ জানুৱাৰী: কৰ্মক্ষেত্ৰখনত উৎকৃষ্ট সেৱা আগবঢ়াই অহা ডিব্ৰুগড় কেন্দ্ৰীয় কাৰাগাৰৰ অধীক্ষক ব্ৰজেন দাসক ৰাষ্ট্ৰপতি পদক সন্মান । অসমলৈ গৌৰৱ কঢ়িয়াই অনা এইগৰাকী অধীক্ষকক শুকুৰবাৰে ডিব্ৰুগড় জিলা উপায়ুক্ত পল্লৱ গোপাল ঝাই সম্বৰ্ধনা জনায় ।
অপৰাধীসকলৰ শাস্তি আৰু পুন সংস্থাপনৰ ক্ষেত্ৰত গুৰুত্বপূৰ্ণ ভূমিকা লোৱা তথা প্ৰশংসনীয় সেৱা আগবঢ়োৱাৰ বাবে গণৰাজ্য দিৱসৰ প্ৰাকক্ষণত ডিব্ৰুগড় কেন্দ্ৰীয় কাৰাগাৰৰ অধীক্ষক ব্ৰজেন দাসৰ নাম ৰাষ্ট্ৰপতি পদকৰ বাবে ঘোষণা কৰা হৈছিল ।
উল্লেখ্য যে, এইবাৰ কাৰাগাৰৰ বিষয়া হিচাপে ৰাষ্ট্ৰপতিৰ সন্মান লাভ কৰা সকলৰ ভিতৰত ব্ৰজেন দাস হৈছে একমাত্ৰ অসম সন্তান । ৰাজ্যৰ কাৰাগাৰসমূহৰ বিষয়া-কৰ্মচাৰীসকলৰ ভিতৰত এইবাৰ কেৱল ব্ৰজেন দাসেই ৰাষ্ট্ৰপতি পদকৰ বাবে নিৰ্বাচিত হৈছে । ব্ৰজেন দাসে ২০১৮ চনৰ মে' মাহত ডিব্ৰুগড় কেন্দ্ৰীয় কাৰাগাৰৰ অধীক্ষক পদৰ দায়িত্বভাৰ গ্ৰহণ কৰিছিল ।
