ডিব্ৰুগড়, 15 জানুৱাৰীঃ মাঘ বিহুৰ দিনাই নিজ গৃহ জিলাতেই ক'লা পতাকাৰ সন্মূখীন হ’ল মুখ্যমন্ত্ৰী সৰ্বানন্দ সোণোৱাল ৷ ৰাজ্যত সংশোধিত নাগৰিকত্ব আইনৰ বিৰুদ্ধে ক্ষোভৰ অগনি জ্বলি থকাৰ মাজতে নিজ গৃহ জিলাত উপস্থিত হৈ মুখ্যমন্ত্ৰী সৰ্বানন্দ সোণোৱালে তীব্ৰ প্ৰতিবাদৰ সন্মুখীন হয়। ক'লা পতাকা দেখাই তীব্ৰ প্ৰতিবাদ ডিব্ৰুগড় জিলা আছুৰ। বিমান বন্দৰৰ পৰা ডিব্ৰুগড়ত অৱতৰণ কৰা লগে লগে মুখ্যমন্ত্ৰী সৰ্বানন্দ সোণোৱালৰ বিৰুদ্ধে প্ৰৱল প্ৰতিবাদ সাব্যস্ত কৰি আছুৱে প্ৰদৰ্শন কৰে ক'লা পতাকা । মোহনবাৰীৰ বিমান বন্দৰৰ পৰা মুলুক গাঁও অভিমুখে ৰাওনা হোৱা বাটতেই এই প্ৰতিবাদৰ সন্মূখীন হয় মুখ্যমন্ত্ৰীগৰাকী ৷
আনহাতে ভোগালী আনন্দৰ উৎসাহৰ মাজতেই ডিব্ৰুগড়ত মুখ্যমন্ত্ৰীৰ বৃহৎ পুত্তলিকা দাহ কাৰ্যসূচী ৷ খেৰ আৰু বাহেৰে নিৰ্মাণ কৰা প্ৰায় ৫০ফুট উচ্চতাৰ পুত্তলিকা দাহ কৰে ডিব্ৰুগড় জিলা আছুৱে । প্ৰায় ৫০ ফুট উচ্চ পুত্তলিকাটোৰ ১৩খনকৈ মুখ বনোৱা হৈছিল । য'ত মুখ্যমন্ত্ৰী সৰ্বানন্দৰ লগতে দেশৰ প্ৰধানমন্ত্ৰী নৰেন্দ্ৰ মোডী, গৃহমন্ত্ৰী অমিত শ্বাহ, বিজেপিৰ ৰাষ্ট্ৰীয় নেতা ৰামমাধৱ, মন্ত্ৰী হিমন্ত বিশ্ব শৰ্মা, কেন্দ্ৰীয় মন্ত্ৰী ৰামেশ্বৰ তেলী, সাংসদ তপন গগৈ, পল্লৱ লোচন দাস, বিধায়ক প্ৰশান্ত ফুকন, ঋতুপৰ্ণ বৰুৱা লগতে অগপৰ তিনি মন্ত্ৰী অতুল বৰা, কেশৱ মহন্ত, ফনীভূষণ চৌধৰীৰ মুখ সন্নিৱিষ্ট কৰা হৈছে । নাগৰিকত্ব সংশোধনী আইনৰ বিৰুদ্ধে আৰু বিভিন্ন শ্ল’গানেৰে পৰিৱেশ উত্তাল কৰি ৰাৱন সদৃশ বৃহৎ আকাৰৰ প্ৰতিমূৰ্তিটোত অগ্নিসংযোগ কৰে ।
উল্লেখ্য জাতিধ্বংসী নাগৰিকত্ব সংশোধনী আইনৰ বিৰুদ্ধে প্ৰৱল ৰূপত প্ৰতিবাদ সাব্যস্ত হৈছিল মুখ্যমন্ত্ৰী সৰ্বানন্দ সোণোৱালৰ গৃহ জিলা ডিব্ৰুগড়ত । এই তীব্ৰ প্ৰতিবাদৰ বাবেই বিগত ডেৰমাহ ধৰি নিজ গৃহ ডিব্ৰুগড়ত অহাৰ পৰা বিৰত আছিল মুখ্যমন্ত্ৰী গৰাকী । কিন্তু আজি দীৰ্ঘদিনৰ অন্তত ব্যাপক নিৰাপত্তা বেষ্টনিৰ মাজত নিজ গৃহত উপস্থিত হয় মুখ্যমন্ত্ৰীগৰাকী । আৰু এয়া ডিব্ৰুগড়ৰ আছুৰ দ্বাৰা তেওঁক আদৰণী বুলি আছুৱে উল্লেখ কৰে ৷
