মৰাণ,২২ জুন : কৰ'ণা (Corona) পৰিস্থিতিৰ বাবে ৰাজ্য অব্যাহত আছে সান্ধ্য আইন (night curfew)। কিন্তু কৰ'ণা বা সান্ধ্য আইনক কোনো কেৰেপ নকৰে একাংশ দুষ্কৃতিকাৰীয়ে । যাৰ বাবে এই জটিল পৰিস্থিতিটো ৰাজ্যত অব্যাহত আছে বিভিন্ন ধৰণৰ অসামাজিক কাৰ্যকলাপ । অৱশ্যে সেই দুষ্টচক্ৰক দমন কৰিবলৈ দিনে- নিশাই সাজু হৈ আছে অসম আৰক্ষী ।
শেহতীয়াকৈ দেখা গৈছে অসম আৰক্ষীয়ে নিষিদ্ধ ড্ৰাগছৰ(Drugs) বিৰুদ্ধে যথেষ্ট পৰিমাণে সষ্টম হৈ পৰিছে । সমান্তৰালকৈ আন আন অসামাজিক কাৰ্যকলাপৰ বিৰুদ্ধেও পদক্ষেপ গ্ৰহণ কৰিছে আৰক্ষীয়ে । ৰাজ্যখনৰ গৰু চুৰি চক্ৰৰ বিৰুদ্ধেও আৰক্ষীয়ে বিভিন্ন স্থানত চলাইছে অভিযান ।
সান্ধ্য আইনৰ সুযোগ লৈ বহু দিনৰ পৰাই ডিব্ৰুগড়ৰ লাহোৱাল অঞ্চলত গৰু চোৰে সন্ত্ৰাস চলাই আহিছে আৰু আৰক্ষীৰ চকুত ধুলি দি চলাই গৈছে ৰমৰমীয়া ব্যৱসায় । এই গৰু চুৰি ঘটনাই লাহোৱাল অঞ্চলটোত তীব্ৰ চাঞ্চ্যলৰ সৃষ্টি কৰি আহিছে । যাৰ বাবে গৰু চুৰি চক্ৰৰ বিৰুদ্ধে সষ্টম হৈছে লাহোৱাল আৰক্ষী । সোমবাৰে নিশা গোপন সূত্ৰৰ পম খেদি লাহোৱাল আৰক্ষীৰ ভাৰপ্ৰাপ্ত বিষয়া অনুপম গুৱালাৰ নেতৃত্বত এটা আৰক্ষীৰ দলে চুৰি হোৱা গৰু ভৰ্তি বাহন জব্দ কৰিবলৈ সক্ষম হয় ।
বাহনখন হৈছে AR-০৯-৯২২৬ নম্বৰৰ এখন টাটা ইন্দিকা । লক্ষণীয়ভাৱে চোৰৰ দলটোৱে বিশেষ কৌশল অৱলম্বন কৰি বাহনখনৰ ভিতৰত আনিছিল চোৰাং গৰুটো । ইতিমধ্যে এই গৰুচুৰি চক্ৰত জড়িত দুটাকৈ চোৰক আটক কৰিছে আৰক্ষীয়ে ।
জানিব পৰা মতে গাড়ীত গৰু চুৰ কৰি অনা চোৰ দুটা ক্ৰমে চাবুৱা মদাৰখাট গাঁওৰ ধ্ৰুৱজ্যোতি গগৈ আৰু নাহৰকটীয়াৰ সুৰুজ গগৈ । এই দুয়োগৰাকীক লাহোৱাল আৰক্ষীয়ে কৰায়ত্ত্ব কৰি ১৭৮/২০২১/ ৩৭৯/ আই পি চি(IPC) ধাৰাত গোচৰ ৰুজু কৰি ইতিমধ্যে জেল হাজোতলৈ প্ৰেৰণ কৰিছে । সান্ধ্য আইনৰ মাজত এনেদৰে বিলাসী বাহনৰ ভিতৰত এনেদৰে গৰু চুৰি কৰি লৈ যোৱা ঘটনাই তীব্ৰ প্ৰতিক্ৰিয়াৰ সৃষ্টি কৰিছে সমগ্ৰ জিলাখনত ।
লগতে পঢ়ক:বিলাসীপাৰাত জব্দ 4 হাজাৰ লিটাৰ নীলা কেৰাচিন
