ডিব্ৰুগড়, 25 ফেব্ৰুৱাৰী : ৰাজ্যৰ অধিকাংশ বেচৰকাৰী বিদ্যালয়ৰ মাজত যেন চলি গৈছে এখন অঘোষিত প্ৰতিযোগিতা ৷ প্ৰতিখন বেচৰকাৰী বিদ্যালয়েই বিভিন্ন সা-সুবিধাৰে ছাত্ৰ-ছাত্ৰীৰ ভৱিষ্যত গঢ়াৰ দায়িত্ব বহন কৰিছে ৷ সবল আন্তঃগাঁথনিৰে এনেসমূহ বিদ্যালয়ৰ কৰ্তৃপক্ষই অভিভাৱকসকলকো পাৰ্যমানে আকৰ্ষণ কৰাৰ চেষ্টা অব্যাহত ৰাখে ৷ বেচৰকাৰী বিদ্যালয় সমূহৰ মাজত চলা এই প্ৰতিযোগিতাৰ ফলত আজি বহু চৰকাৰী বিদ্যালয় মৃতপ্ৰায় অৱস্থালৈ গতি কৰিছে ৷ বহুসংখ্যক চৰকাৰী বিদ্যালয় ইতিমধ্যেই বন্ধ হৈ পৰিছে ৷
এনে সংবেদনশীল পৰিস্থিতিৰ মাজতো এতিয়া গা কৰি উঠিছে এখন চৰকাৰী বিদ্যালয়ে ৷ সকলোৰে দৃষ্টি আকৰ্ষণ কৰিছে এইখন বিদ্যালয়ে (Govt school of Assam) ৷ বেচৰকাৰী নামী-দামী বিদ্যালয়ৰ সমানেই উন্নত চাচনী যমুনামুখ উচ্চ মাধ্যমিক বিদ্যালয় ৷ সামাজিক মাধ্যমকে ধৰি বিভিন্ন স্তৰত চৰ্চা লাভ কৰাৰ পাছত অৱশেষত বিদ্যালয়খন পৰিভ্ৰমণ কৰাৰ উদ্দেশ্যে উপস্থিত হ’ল খোদ শিক্ষামন্ত্ৰী ৰণোজ পেগু (Government school in Assam viral on social media) ৷ এইখন চৰকাৰী বিদ্যালয়ে দৃষ্টি আকৰ্ষণ কৰিছে এতিয়া বহুজনৰ ।
নামী-দামী ব্যক্তিগত খণ্ডৰ বিদ্যালয়ৰ দৰে সকলো সা-সুবিধাৰে পৰিপূৰ্ণ অতি ভিতৰুৱা অঞ্চলৰ এইখন চৰকাৰী বিদ্যালয় । পৰিস্কাৰ পৰিচ্ছন্ন বিদ্যালয়ৰ চৌহদ, শ্ৰেণীকোঠা, বাথৰুমৰ লগতে ছাত্ৰ-ছাত্ৰীৰ বাবে আছে বিশুদ্ধ খোৱা পানীৰ ব্যৱস্থা ৷ ঠাণ্ডা দিনত গৰম পানী খোৱাৰো ব্যৱস্থা ৰখা হৈছে বিদ্যালয়খনত । চৰকাৰী বিদ্যালয় বুলিলে সাধৰণতে যিখন প্ৰতিচ্ছবি বা যেনে ধাৰণা আপোনাৰ মনলৈ আহে তাক সলনি কৰিব এইখন চৰকাৰী বিদ্যালয়ৰ পৰিৱেশে । ব্যক্তিগত খণ্ডৰ বিদ্যালয়ৰ লগত সমানে ফেৰ মাৰিব পৰাকৈ এইখন চৰকাৰী বিদ্যালয়ৰ আছে সকলো সা-সুবিধা তথা আন্তঃগাঁথনি ।
চাচনী যমুনামুখ উচ্চ মাধ্যমিক বিদ্যালয়ত ছাত্ৰ- ছাত্ৰীৰ বাবে ব্যক্তিগত খণ্ডৰ বিদ্যালয়ৰ দৰেই আছে সকলো সুবিধা (Sasoni Yamunamukh high school) । বিদ্যালয়খনৰ প্ৰধান শিক্ষক ভূপেন গোহাঁইয়ে আন শিক্ষকসকলৰ সহযোগত নিজৰ প্ৰচেষ্টাৰে নিৰ্মাণ কৰিছে আত্যাধুনিক water purifier । বিদ্যালয়ৰ ছাত্ৰ- ছাত্ৰীয়ে বিশুদ্ধ গৰম আৰু ঠাণ্ডা পানী খাব পৰাকৈ কৰিছে এই ব্যৱস্থা । Computer শিক্ষক নাই যদিও সীমিত জ্ঞানেৰে ছাত্ৰ-ছাত্ৰীক শিক্ষক সকলে দি আহিছে কম্পিউটাৰৰ শিক্ষা । বিদ্যালয়খনৰ পৰিষ্কাৰ চৌহদ, শ্ৰেণীকোঠাৰ লগতে পৰিষ্কাৰ আৰু বিজ্ঞানসন্মতভাবে নিৰ্মাণ কৰা হৈছে বাথৰুম । চৰকাৰৰ প্ৰতিটো আঁচনি সঠিকভাৱে ব্যৱহাৰ কৰি নিৰ্মাণ কৰা হৈছে বিদ্যালয়খনৰ আন্তঃগাঁথনি, যাৰ বাবে আন আন চৰকাৰী বিদ্যালয়ৰ বাবেও আদৰ্শ হৈ পৰিছে এইখন চাচনী যমুনামুখ উচ্চ মাধ্যমিক বিদ্যালয় ।
ইফালে বিদ্যালয়খনৰ পৰিচালনা তথা বিভিন্ন সা-সুবিধাৰ সবিশেষ সামাজিক মাধ্যমত যথেষ্ট প্ৰচাৰ হোৱাৰ পিছত বৃহস্পতিবাৰে বিদ্যালয়খনত উপস্থিত হয় খোদ শিক্ষামন্ত্ৰী ৰণোজ পেগু (Ranoj Pegu Sasoni Govt school) । মন্ত্ৰীগৰাকীয়ে বিদ্যালয়খন পৰিদৰ্শন কৰাৰ লগতে বিদ্যালয়ৰ ছাত্ৰ-ছাত্ৰী সকলৰ সৈতেও মত বিনিময় কৰে । এখন বিদ্যালয়ৰ পৰিৱেশ তথা আন্তঃগাঁথনি ভাল কৰিবলৈ হ'লে বহু টকা পইচাৰ প্ৰয়োজন নহয়, প্ৰয়োজন হয় বিদ্যালয় খনৰ শিক্ষক-শিক্ষয়িত্ৰী তথা বিদ্যালয় পৰিচালনা সমিতিৰ সদস্য সদস্যাৰ মনৰ ইচ্ছা আৰু সেয়া কৰি দেখুৱালে যমুনামুখ উচ্চ মাধ্যমিক বিদ্যালয়ে ।
লগতে পঢ়ক : Missing student rescued: মৰিয়নিত উদ্ধাৰ কটনৰ সন্ধানহীন ছাত্ৰ সূৰ্য নাৰায়ণ দাস
