ডিব্ৰুগড়,22 আগষ্ট : আৰক্ষী-প্ৰশাসনৰ চকুত ধূলি দি ডিব্ৰুগড়ত অব্যাহত আছে কাঠ ফলা মিলৰ ৰমৰমীয়া বেহা ৷ বিয়াগোম বন বিভাগৰ অধীনত জিলাখনৰ ঠায়ে ঠায়ে থকা বন সংমণ্ডল সমূহৰ বিষয়া কৰ্মচাৰীৰ চকুত ধূলি মাৰি চলি আছে অবৈধ কাঠ আৰু কাঠফলা মিলৰ বেহা ৷ ডিব্ৰুগড়ৰ ৰহমৰীয়াত 5 টা অবৈধ কাঠ ফলা মিল জব্দ তথা উচ্ছেদ ডিব্ৰুগড়ৰ বন বিভাগে ৷ প্ৰাপ্ত খবৰ মতে, ৰহমৰীয়াৰ ব'ৰ'তি চুক অঞ্চলত দীৰ্ঘদিন ধৰি এই অবৈধ কাঠ ফলা মিল সমূহ চলাই থকা হৈছিল ৷
ইয়াৰ মাজতে দেওবাৰে ডিব্ৰুগড় বন সংমণ্ডলৰ ৰেঞ্জাৰ প্ৰাঞ্জল বৰুৱাৰ নেতৃত্বত যোৱা বিভাগৰ এটা দল আৰু ৰহমৰীয়া আৰক্ষীৰ সহযোগত অতৰ্কিতে অভিযান চলাই এই অবৈধ মিল সমূহ জব্দ কৰে ৷ লগতে 26 টাকৈ মূল্যৱান কাঠৰ কুণ্ডাও এই অভিযান কালত জব্দ কৰে বিভাগৰ দলটোৱে ৷ বন বিভাগৰ বিষয়াই জনোৱা অনুসৰি এই সমূহ অবৈধ মিলৰ বিৰুদ্ধে অভিযান তীব্ৰতৰ কৰা হৈছে ৷ জিলাখনত অবৈধভাৱে চলি থকা প্ৰতিটো মিল জব্দ কৰাৰ লগতে মিলৰ মালিক সকলৰ বিৰুদ্ধেও ব্যৱস্থা গ্ৰহণ কৰা হ'ব ৷
মন কৰিবলগীয়া যে, অসমৰ বিভিন্ন জিলাত আৰক্ষী তথা বন বিভাগৰ চকুত ধূলি মাৰি একাংশ দুষ্ট লোকে অব্যাহত ৰাখিছে কাঠ ফলা মিলৰ অবৈধ ব্যৱসায় ৷
কিন্তু এই সমূহ মিল বন্ধ কৰাৰ লগতে মিলৰ মালিক সকলৰ বিৰুদ্ধে কোনোধৰণৰ বিশেষ পদক্ষেপ গ্ৰহণ কৰা নাই সংশ্লিষ্ট বিভাগে ৷ ইফালে একাংশ বিষয়া-কৰ্মচাৰীয়ে এইসমূহ মিলৰ লগত ধনৰ লেনদেন কৰি দেখিও নেদেখাৰ ভাও জোৰাৰ অভিযোগ উত্থাপন কৰে সচেতন ৰাইজে ৷
লগতে পঢ়কঃ চৰকাৰী চাকৰিত জনসংখ্যা নীতি : অৱশেষত জাৰি হ'ল জাননী
