পূৱ বিলাসীপাৰা, 28 জুন : ৰাজ্যৰ নতুন শক্তিমন্ত্ৰী হিচাপে বিমল বৰাই দায়িত্ব ভাৰ গ্ৰহণ কৰা পাছৰে পৰাই অধিক কঠোৰ হৈছে বিদ্যুৎ বিভাগ ৷ বিশেষকৈ অনাদায় বিদ্যুৎ বিল, বিদ্যুৎ চুৰিৰ বিৰুদ্ধে সৰৱ হৈছে বিদ্যুৎ বিভাগ ৷ ইয়াৰক মাজতে বিদ্যুৎ বিল আদায় কৰিবলৈ এতিয়া চাপৰ বিদ্যুৎ উপ-সংমণ্ডলে সংঘটিত কৰিছে নাভূত নাশ্ৰুত কাণ্ড ৷
অভিযোগ মতে, ধুবুৰী জিলাৰ চাপৰৰ দুধনাথ গাঁৱৰ একাংশ ব্যক্তিয়ে বিদ্যুতৰ মাচুল আদায় নিদিয়াৰ বাবে এতিয়া সমগ্ৰ গাঁওখনৰে বিদ্যুৎ সংযোগ কৰ্তন কৰিছে চাপৰ বিদ্যুৎ উপ-সংমণ্ডলে ৷ এই কাণ্ডত আচৰিত হৈছে সমগ্ৰ গাঁওবাসী ৷ উপায়ন্তৰ হৈ শক্তি বিভাগৰ এই কাৰ্যৰ বিৰুদ্ধে চাপৰৰ দুধনাথ গাঁৱৰ ৰাইজে সাব্যস্ত কৰিছে প্ৰতিবাদী কাৰ্যসূচী ৷
উল্লেখ যে, যোৱা 16 জুন তাৰিখৰ পৰা গাঁৱখনৰ সম্পূৰ্ণ বিদ্যুৎ সংযোগ কৰ্তন কৰিছে বুলি জানিবলৈ দিছে স্থানীয় ৰাইজে ৷ যাৰ ফলত গাঁওখনৰ ছাত্ৰ-ছাত্ৰী সকলে অনলাইন (Online) পাঠদানৰ পৰা বঞ্চিত হ'ব লগা হৈছে ৷ ইফালে প্ৰচণ্ড গৰমে জলা-কলা খুৱাইছে গাঁওবাসীক ৷ উপায়ন্তৰ হৈ ৰাইজে চাপৰ বিদ্যুৎ উপ-সংমণ্ডলক এই বিষয়ে লিখিত অভিযোগ দিয়াৰ পিছতো আজি লৈকে বিদ্যুৎ বিভাগে কোনো ধৰণৰ ব্যৱস্থা গ্ৰহণ নকৰাৰ অভিযোগ উত্থাপন কৰিছে ৰাইজে ৷ চাপৰ বিদ্যুৎ উপ-সংমণ্ডলৰ কাৰ্যত অতীষ্ঠ হৈ অৱশেষত উপসংমণ্ডলৰ বিৰুদ্ধে প্ৰতিবাদী কাৰ্যসূচী ৰূপায়ন কৰিছে ভুক্তভোগী ৰাইজে ৷
সোমবাৰে চাপৰ বিদ্যুৎ উপসংমণ্ডলৰ বিৰুদ্ধে বিভিন্ন অভিযোগ উত্থাপন কৰি তথা বিভিন্ন শ্ল’গানেৰে পৰিৱেশ উত্তাল কৰি তোলে প্ৰতিবাদকাৰী সকলে ৷ ৰাইজৰ দাবী, যিসমূহ পৰিয়ালে বিদ্যুতৰ মাচুল নিয়মীয়াকৈ পৰিশোধ কৰি আছে সেই সমূহ পৰিয়ালত অচিৰেই বিদ্যুতৰ সংযোগ ঘূৰাই দিব লাগে চাপৰ বিদ্যুত উপ-সংমণ্ডলে ৷ অন্যথা ইয়াতকৈ জংগী আন্দোলন গঢ়ি তোলাৰ হুংকাৰ দিছে ভুক্তভোগী ৰাইজে ৷
উল্লেখনীয় যে,পুনৰ বাৰ শাসনলৈ অহা বিজেপি নেতৃত্বাধীন চৰকাৰখনে দায়িত্বভাৰ গ্ৰহণ কৰা পাছৰে পৰা বিদ্যুৎ চুৰি তথা বিদ্যুতৰ মাচুল পৰিশোধ নকৰা পৰিয়াল সমূহৰ বিৰুদ্ধে গ্ৰহণ কৰিছে কঠোৰ নীতি ৷ শেহতীয়াকৈ বিদ্যুতৰ মাচুল পৰিশোধ নকৰা চৰকাৰী কৰ্মচাৰী সকলৰ মাহেকীয়া দৰমহা বন্ধ ৰখাৰো সিদ্ধান্ত গ্ৰহণ কৰিছে চৰকাৰে ৷
লগতে পঢ়কঃ চিৰাঙত প্ৰাক্তন NDFB সদস্যৰ দক্ষতা বিকাশ প্ৰশিক্ষণ
