বিলাসীপাৰা, 17 জুলাই: "মোক মোৰ ল'ৰাটো উলিয়াই দিয়ক ৷ মোৰ বুকু শুদা হৈ গৈছে ৷ সি যোৱা 2 মাহ এতিয়ালৈ তাৰ কোনো খা-খবৰ নাই ৷" কেমেৰাৰ সন্মুখত হিয়া ধাকুৰি কান্দিলে এগৰাকী দুৰ্ভগীয়া মাতৃয়ে ৷ বিলাসীপাৰাৰ সীমান্তৱৰ্তী তথা কোকৰাঝাৰ জিলাৰ মালগাঁৱৰ বগুলাউৰাত কান্দোলৰ ৰোল ৷ একেখন গাঁৱৰে 7 জনকৈ যুৱক নিৰুদ্দেশ ৷ এই ঘটনাই শংকিত কৰিছে অভিভাৱকৰ লগতে সমগ্ৰ গাঁওবাসীক (Youths missing from Bilasipara) ৷
জানিব পৰামতে, অভয়াপুৰীৰ ৰেজাউল কৰিম নামৰ এগৰাকী ঠিকাদাৰে কাম দিয়াৰ উদ্দেশ্যৰে অৰুণাচল প্ৰদেশৰ ৰাজধানী ইটানগৰলৈ লৈ গৈছিল এইখন গাঁৱৰে 7 গৰাকী যুৱকক ৷ তাৰ পিছৰে পৰাই নিৰুদ্দেশ হৈ আছে 7 জনকৈ যুৱক ৷ নিখোজ হৈ থকা যুৱক কেইজন হৈছে মনোৱাৰ হুছাইন, ছামিৰুল সেখ, আবুল হুছাইন, কালিমুদ্দিন সেখ, ফৰিজুল হক, আয়নাল হক আৰু মাজিদুল আলী ৷
আত্মীয়ই কোৱা অনুসৰি যোৱাৰ পিছৰে পৰা যুৱককেইজনৰ ফোন বন্ধ হৈ থকাৰ লগতে কোনো খা-খবৰ পোৱা নাই ৷ যুৱককেইজনৰ ফালৰ পৰাও এটাও ফোন অহা নাই পৰিয়ালৰ লোকলৈ ৷ ফলত চিন্তিত হৈছে যুৱককেইজনৰ আত্মীয়ৰ লগতে গাঁওবাসীও ৷
ইতিমধ্যে ঘটনা সন্দৰ্ভত যুৱক কেইজনৰ পৰিয়ালৰ লোকে কোকৰাঝাৰ থানাত (Kokrajhar police station)এজাহাৰ দাখিল কৰিছে যদিও আৰক্ষীয়ে কোনো সন্ধান উলিয়াৱলৈ সক্ষম হোৱা নাই ৷ ভুক্তভোগী পৰিয়াল কেইটাই অসমৰ মুখ্যমন্ত্ৰী ড৹ হিমন্ত বিশ্ব শৰ্মা আৰু বিটিআৰ প্ৰধান প্ৰমোদ বড়োক যুৱক কেইজনৰ সন্ধান উলিয়াই পৰিয়ালক চমজাই দিবলৈ কাতৰ অনুৰোধ জনায় ৷
লগতে পঢ়ক : Woman missing at Bongaigaon: ছবছৰীয়া পুত্ৰৰ সৈতে নিৰুদ্দেশ মাতৃ
