ধুবুৰী, 5 ডিচেম্বৰ: শনিবাৰে ধুবুৰীত দুটাকৈ অভিলাসী আঁচনিৰ শুভাৰম্ভ কৰে অসম চৰকাৰৰ খাদ্য আৰু যোগান বিভাগৰ মন্ত্ৰী ফণীভূষণ চৌধুৰীয়ে । উল্লেখ্য যে, বিগত দিনবোৰত হৈ যোৱা বানৰ ফলত ধুবুৰীৰ পৰা পাটামাৰী আৰু বিন্নাচৰালৈ যোৱা বাট-পথ বিধ্বস্ত হৈ পৰিছে । ফলত ধুবুৰীৰ সীমান্তৱৰ্তী ৰাইজে যাতায়াতৰ ক্ষেত্ৰত চৰম দুৰ্ভোগ ভুগিবলগীয়া হৈছে । সীমান্ত অঞ্চলৰ ৰাইজৰ দীর্ঘদিনীয়া দাবীৰ প্ৰতি অধিক গুৰুত্ব আৰোপ কৰে ধুবুৰীৰ বিধায়ক নজৰুল হকে । ফলত ৰাজ্য চৰকাৰে ধুবুৰীৰ পৰা পাটামাৰীলৈ যোৱা হাউৰাৰ পাৰৰ পৰা ছিলঘাগৰীলৈকে পথ আৰু বান্ধ নিৰ্মাণৰ বাবে ধুবুৰী জল সম্পদ সংমণ্ডলৰ দ্বাৰা ৰাজ্যিক দুৰ্যোগ প্ৰসমণ পুঁজিৰ শিতানত ২ কোটি ৯০ লাখ টকা আৱণ্টণ দিয়ে ।
আনহাতে বানৰ সমান্তৰালকৈ গংগাধৰ নৈৰ প্ৰবল গৰাখহনীয়াই ভয়ংকৰ ৰূপ ধাৰণ কৰা বিন্নাচৰাৰ সীমান্তৱৰ্তী অঞ্চল সমূহৰ বাট পথ সম্পূৰ্ণৰূপে বিধ্বস্ত হৈ গৈছে যোৱা কেইটা বছৰে । বিন্নাচৰা অঞ্চলত পথ আৰু বান্ধ নিৰ্মাণৰ বাবেও চৰকাৰে ধুবুৰী জল সম্পদ সংমণ্ডলৰ দ্বাৰা ৰাজ্যিক দুৰ্যোগ প্ৰসমন পুঁজিৰ শিতানত মুঠ ৫ কোটি ৮০ লাখ টকা আৱণ্টণ দিয়ে । শনিবাৰে ধুবুৰী সমষ্টিৰ বিধায়ক নজৰুল হকৰ উপস্থিতিত অসম চৰকাৰৰ খাদ্য আৰু যোগান বিভাগৰ মন্ত্ৰী ফণীভূষণ চৌধুৰীয়ে দুয়োটা আঁচনিৰ শুভাৰম্ভণি কৰে । সীমান্তৱৰ্তী ৰাইজৰ দীর্ঘদিনীয়া দাবীৰ প্ৰতি স্থানীয় বিধায়কৰ লগতে চৰকাৰেও গুৰুত্ব প্ৰদান কৰাত সন্তুষ্টি প্ৰকাশ কৰে ৰাইজে । ৰাইজক খহনীয়াৰ ভয়াৱহ দৃশ্য প্ৰত্যক্ষ কৰি খহনীয়া প্ৰতিৰোধৰ আশ্বাস প্ৰদান কৰে মন্ত্ৰী গৰাকীয়ে । শীঘ্ৰেই ব্ৰহ্মপুত্ৰ আৰু গংগাধৰৰ গৰাখহনীয়াৰ স্থায়ী প্ৰতিৰোধৰ দাবী জনায় ৰাইজে ।
লগতে পঢ়ক: আগন্তুক ৫ বছৰত অসমৰ ৰাজনীতি নিয়ন্ত্ৰণ কৰিব কেওটসকলে
