ধুবুৰী, 10 নৱেম্বৰ : ধুবুৰীৰ ভোগদহৰত প্ৰাক্তন পঞ্চায়ত সভাপতিসহ এজনৰ বিৰুদ্ধে উত্থাপন হৈছে যৌন নিৰ্যাতন(Rape)ৰ অভিযোগ ৷ অভিযুক্তৰ বিৰুদ্ধে থানাত এজাহাৰ দাখিল কৰিছে ভুক্তভোগী মহিলাই ৷ প্ৰাপ্ত তথ্য অনুসৰি, কিছুদিন পূৰ্বে ভোগদহৰ গাঁও পঞ্চায়ত এলেকাৰ কলাপাকানী দ্বিতীয় খণ্ড গাঁৱৰ এগৰাকী বিবাহিতা মহিলাৰ সৈতে অবৈধ সম্পৰ্ক স্থাপনৰ প্ৰস্তাৱ দিছিল প্ৰাক্তন পঞ্চায়ত সভাপতি আতাউৰ ৰহমানে ।
মহিলাগৰাকীয়ে ইয়াৰ বিৰোধিতা কৰাত পুনৰ 5 নৱেম্বৰৰ নিশা সভাপতি আতাউৰ ৰহমানে বলপূৰ্বকভাৱে ধৰ্ষণ কৰে মহিলাগৰাকীক । সেই সময়তে জাইদুল ইছলাম নামৰ আন এজন লোকে মহিলাগৰাকীৰ মূৰত পিষ্টল টোৱাই ভয়-ভাবুকি প্ৰদান কৰাৰ অভিযোগ উত্থাপন কৰিছে ভুক্তভোগী মহিলাগৰাকীয়ে ৷
মহিলাগৰাকীয়ে ইতিমধ্যে দুই অভিযুক্তৰ বিৰুদ্ধে থানাত এজাহাৰ দাখিল কৰিছে ৷ এজাহাৰৰ ভিত্তিত মহিলা গৰাকীৰ স্বাস্থ্য পৰীক্ষা কৰাই ঘটনাৰ তদন্ত আৰম্ভ কৰিছে ধুবুৰীৰ এ এম কোঃ ৰোড আৰক্ষীয়ে । ইফালে প্ৰাক্তন পঞ্চায়ত সভাপতি আতাউৰ ৰহমানে এই অভিযোগ খণ্ডন কৰে যদিও আৰক্ষীৰ তদন্তৰ পাচতহে পোহৰলৈ আহিব সকলো তথ্য ।
বাতৰি লিখা পৰলৈকে আৰক্ষীয়ে কোনো এজন অভিযুক্তক গ্ৰেপ্তাৰ কৰিবলৈ সক্ষম হোৱা নাই বুলি জানিব পৰা গৈছে ।
লগতে পঢ়ক : প্ৰেমৰ প্ৰস্তাৱ নামানিলে গণ-ধৰ্ষণৰ ভাবুকি দিলে নাজিমূলে; শংকিত ছাত্ৰীৰ আত্মহত্যা !
