ধুবুৰী, 16 জুন : ৰাজ্যৰ বিভিন্ন প্ৰান্তৰ লগতে ধুবুৰীৰ সদৰ চহৰকে ধৰি বিভিন্ন অঞ্চল এতিয়া বুৰ গৈছে পানীৰ তলত (Flood in Dhuburi) ৷ নেৰানেপেৰা বৰষুণৰ ফলত ব্ৰহ্মপুত্ৰকে ধৰি ইয়াৰ বিভিন্ন উপনৈৰ জলস্তৰ ক্ৰমাৎ বৃদ্ধি পাইছে ৷ বিভিন্ন নৈ জলস্তৰ এতিয়া বিপদ সীমাৰ ওপৰেৰে বৈছে (Brahmaputra crosses danger level mark in Dhuburi) ৷ যাৰ পৰিপেক্ষিতত ধুবুৰী জিলা উপায়ুক্ত তথা ধুবুৰী জিলা দুৰ্যোগ ব্যৱস্থাপনাৰ অধ্যক্ষ আন্বামুথন এম পিয়ে জাৰি কৰিছে এক বিশেষ নিৰ্দেশনা ।
সেই নিৰ্দেশনা অনুসৰি, দুৰ্যোগ ব্যৱস্থাপনা আইনৰ অধীনত ৰাজহুৱা স্বাৰ্থত ব্ৰহ্মপুত্ৰ আৰু ইয়াৰ উপনৈসমূহত সকলো ধৰণৰ নাও, লঞ্চ অথবা ফেৰী চলাচলত সম্পূৰ্ণৰূপে নিষেধাজ্ঞা জাৰি কৰা হৈছে ৷ অৱশ্যে এই ক্ষেত্ৰত জৰুৰীকালিন সেৱা বা সাহায্য আৰু উদ্ধাৰ অভিযানত ব্যৱহৃত নাও বা জাহাজক ৰেহাই প্ৰদান কৰা হৈছে ৷
ইপিনে ধুবুৰী সদৰ চহৰৰ আঠ, ন, দহ, বাৰ, তেৰ, চৈধ্য আৰু পোন্ধৰ নম্বৰ ৱাৰ্ডত কৃত্ৰিম বানে এক ভয়াৱহ ৰূপ ধাৰণ কৰা পৰিলক্ষিত হৈছে । বিশেষকৈ ধুবুৰী জিলা কাৰাগাৰ, ধুবুৰী বাছ আস্থান, ধুবুৰীৰ শান্তি নগৰ আৰু ইন্দিৰা গান্ধী পথৰ বৃহত্তৰ অঞ্চলত যোৱা প্ৰায় দহ দিনৰ পৰাই এক অৱৰ্ণনীয় পৰিস্থিতিৰ উদ্ভৱ হোৱা পৰিলক্ষিত হৈছে ।
ইপিনে কৃত্ৰিম বানে অভাৱনীয় পৰিস্থিতিৰ সৃষ্টি কৰিছে ধুবুৰী আৰক্ষী আৱাসস্থল এলেকাতো । শতাধিক আৰক্ষী পৰিয়াল বসবাস কৰা আৰক্ষী আৱাসস্থলত বিগত প্ৰায় এক সপ্তাহে পানী সোমাই যোৱাৰ ফলত হাহাকাৰময় অৱস্থাৰ সৃষ্টি হৈছে । বহু আৰক্ষী পৰিয়ালে এৰিছে ঘৰ বাৰী । একাংশ পৰিয়ালে বানৰ মাজতো আৱাসগৃহত থাকি বহু কষ্টেৰে পালন কৰি গৈছে নিজৰ কৰ্তব্য ।
আনহাতে, বৰষুণৰ মাজতো যুদ্ধংদেহী তৎপৰতাৰে জাৱৰ নিষ্কাশন আৰু নলা বেদখলমুক্ত অভিযানত নিজেই নামি পৰিছে জিলা উপায়ুক্ত আৰু আৰক্ষী অধীক্ষকগৰাকী । ধুবুৰী চহৰৰ বিভিন্ন নলা নৰ্দমাত জাৱৰ পেলাই বন্ধ কৰাৰ বিপৰীতে একাংশ লোকে নলা নৰ্দমা দখল কৰি নিৰ্মাণ কৰিছে ঘৰ দুৱাৰ । সেয়ে ধুবুৰী চহৰৰ প্ৰতিটো স্থানত নলা নৰ্দমাৰ বেদখল মুক্ত কৰাৰ অভিযান চলিব বুলি উল্লেখ কৰে উপায়ুক্ত আন্বামুথন এম পিয়ে ।
লগতে পঢ়ক : Flood in Biswanath : জৰাসৰ নৈ বাঢ়নি পানীৰ তলত ১৫ নং ৰাষ্ট্ৰীয় ঘাইপথ
