পূব বিলাসীপাৰা,3এপ্ৰিলঃ আপুনি ভোট দিয়ক,তাৰ বিনিময়ত আপুনি নিৰ্বাচনৰ পিছত লাভ কৰিব এখন বিলাসী চাৰিচকীয়া বাহন ৷ পিছে ৰ'ব এই বাম্পাৰ অ'ফাৰ সকলোৰে বাবে নহয়,এইয়া কেৱল পূব বিলাসীপাৰা সমষ্টিৰ যুৱকসকলৰ বাবেহে প্ৰযোজ্য ৷ যুৱ ভোটাৰক আকৃষ্ট কৰিবলৈ ৰাজ্যৰ প্ৰভাৱশালী মন্ত্ৰী হিমন্ত বিশ্ব শৰ্মাৰ বুলেটৰ অ'ফাৰক প্ৰত্যাহ্বান জনাই চাৰিচকীয়া বাহনৰ অ'ফাৰকে দি দিলে পূব বিলাসীপাৰা সমষ্টিৰ JD(U) দলৰ প্ৰাৰ্থী আব্দুল মোনাফ প্ৰমাণিকে ৷ নিৰ্বাচনত জয়ী হ'লেই সমষ্টিটোৰ সকলো যুৱকক চাৰিচকীয়া বাহন দিয়াৰ প্ৰতিশ্ৰুতি দিয়ে প্ৰাৰ্থীগৰাকীয়ে ৷
ইপিনে,2জন PSOক লগত লৈ অকলেই ৰাইজৰ ঘৰে-ঘৰে,দোকানে-পোহাৰে খোজকাঢ়ি গৈ ভোট বিচাৰি ফুৰা আব্দুল মোনাফ প্ৰমাণিক যথেষ্ট আত্মবিশ্বাসী নিজৰ জয়ক লৈ ৷ সাংবাদিকক ক'লে,অসমত পাৰ্টিটো নতুন হ'ব পাৰে, কিন্তু নিৰ্বাচনত বিপুল ভোটত তেওঁৰ জয় নিশ্চিত ৷ তদুপৰি সমষ্টিবাসীক তেওঁৰ প্ৰতীক চিহ্ন তীৰৰ ছবিত ভোট দিবলৈও অনুৰোধ জনায় ৷
আনহাতে,ৰাজ্যত প্ৰথম আৰু দ্বিতীয় পৰ্যায়ৰ নিৰ্বাচন শেষ হোৱাৰ অন্তত এতিয়া এইদৰেই তুংগত উঠিছে তৃতীয় পৰ্য়ায়ৰ বাবে নিৰ্বাচনী প্ৰচাৰ ৷ প্ৰতিশ্ৰুতিৰ টোপোলা লৈ প্ৰাৰ্থী কাষ চাপিছে ভোটাৰ ৰাইজৰ ৷ লক্ষণীয় হ'ব,পূব বিলাসীপাৰা সমষ্টিৰ JD(U) দলৰ প্ৰাৰ্থী আব্দুল মোনাফ প্ৰমাণিকৰ বিলাসী চাৰিচুকীয়া বাহনৰ এই বাম্পাৰ অ'ফাৰে পূব বিলাসীপাৰাৰ যুৱ ভোটাৰক কিমান আকৰ্ষিত কৰিব পাৰে ৷
লগতে পঢ়কঃ সবাতোকৈ ধনী প্ৰাৰ্থীজন প্ৰথমবাৰৰ বাবে নিৰ্বাচনী যুঁজত
