ধুবুৰী, 7 এপ্ৰিল: নিৰ্বাচনৰ পূৰ্বে কংগ্ৰেছৰ মনোনীত প্ৰাৰ্থী আবু তাহেৰ বেপাৰীয়ে গাঁৱে গাঁৱে আৰু প্ৰতিটো পঞ্চায়তত কৰ্মী সভা অনুষ্ঠিত কৰি নিৰ্বাচনী প্ৰচাৰ চলাইছে ৷ তৃতীয় পৰ্যায়ৰ নিৰ্বাচন ক্ৰমাৎ চমু চাপি অহাৰ বাবে প্ৰচাৰৰ লগতে দলৰ সাংগঠনিক ভেটি শক্তিশালী কৰাৰ বাবেও উঠি পৰি লাগিছে কংগ্ৰেছ দল৷ প্ৰচাৰ অভিযানতে বিগত দহ বছৰ ধৰি ধুবুৰী সমষ্টি দখল কৰি ৰখা বদৰুদ্দিন আজমলৰ বিৰুদ্ধে একপ্ৰকাৰৰ যুদ্ধ ঘোষণা কৰে আবু তাহেৰে ৷ জিলা মহিলা কংগ্ৰেছৰ সভানেত্ৰী বেবী বেগমেও এইবাৰ মহিলা ভোটাৰ সচেতন হৈছে বুলি মন্তব্য কৰি কয় যে, সৰহসংখ্যক মহিলা ভোটাৰে কংগ্ৰেছতে ভোটদান কৰিব ৷
ইফালে বদৰুদ্দিনৰ হৈ নিৰ্বাচনী প্ৰচাৰ চলোৱা এ আই ইউ ডি এফৰ বিধায়ক নজৰুল হকে মন্তব্য কৰে যে, ধুবুৰীত আবু তাহেৰৰ বেপাৰ নচলে, আজমলৰ বেপাৰহে চলে ৷ এই সমালোচনাৰ পাছতে কংগ্ৰেছ প্ৰাৰ্থী আবু তাহেৰে ওভটি ধৰি কয় যে, আজমলৰ টেঙা আমৰ বেপাৰ এইবাৰ বন্ধ হ'ব ৷
