বিলাসীপাৰা, 21 এপ্ৰিলঃ তৃতীয় পৰ্যায়ৰ নিৰ্বাচনৰ মাজত মাথো দুটা দিন বাকী ৷ নিৰ্বাচনী বৈতৰণী পাৰ হবলৈ কি শাসক কি বিৰোধী, তংগত তুলিছে নিৰ্বাচনী প্ৰচাৰ অভিযান ৷ বাদ পৰি থকা নাই এ আই ইউ ডি এফ দলো ৷ কি গৰু, কি গাহৰি সকলো এতিয়া নিৰ্বাচনী অস্ত্ৰ ৷ মুছলমান মানুহে বিজেপি,এজিপি অথবা কংগ্ৰেছক ভোট দিলে খাব লাগিব গাহৰি ৷ এই মন্তব্য এগৰাকী জনপ্ৰতিনিধিৰ ৷ ধুবুৰীত তৃতীয় পৰ্যায়ৰ নিৰ্বাচনী প্ৰচাৰ অভিযানত এই বিতৰ্কিত মন্তব্য সাংসদ বদৰুদ্দিন আজমলৰ | শনিবাৰে বিলাসীপাৰাৰ শিমলাকান্দিত এখন নিৰ্বাচনী গণ সমাবেশ অংশ গ্ৰহণ জৰা-ফুকা কৰাৰ মাজতে বদৰুদ্দিন আজমলে কৰা এই সাম্প্ৰদায়িক মন্তব্যই চাঞ্চল্যৰ সৃষ্টি কৰিছে| মাথো এইয়াই নহয় হেলিকপ্টাৰৰে ধূলি উৰোৱাই গণ সমাৱেশত ভাগ লোৱা আজমলে চকুৰ পানী টুকি আৱেগিক ৰাজনীতিৰে ৰাইজৰ মন জয় কৰাৰো চেষ্টা চলোৱা পৰিলক্ষিত হয় ৷
ইয়াৰোপৰি শুক্ৰবাৰে ইছলাম ধৰ্মাৱলম্বী লোকসকল সবে কদৰ উৎসৱৰ অংশ ৰূপে আজমলে নিজৰ ভাষণত মুছলমান লোকক হিংসা বিদ্বেষ পাহৰি আল্লাৰ উপাসনা কৰিবলৈ আহ্বান জনায় | উপস্থিত ৰাইজৰ উদ্দেশ্যি আজমলে দেশ তথা অসমক আৰ এছ এছ আৰু নৰেন্দ্ৰ মোদীৰ পৰা উদ্ধাৰ কৰিবলৈ আহ্বান জনাই | আনহাতে সাংসদ গৰাকীয়ে ৰাজ্যত কংগ্ৰেছ দলক বিৰোধ কৰিলেও চতুৰালিৰে আকৌ কেন্দ্ৰত কংগ্ৰেছৰ মহা জোঁট বন্ধনক সমৰ্থন আগবঢ়াব বুলিও মতপোষণ কৰে |
