জোনাই, 24 ছেপ্টেম্বৰ: সভ্য সমাজক কলুষিত কৰা এক ধৰ্ষণকাণ্ডই সমগ্ৰ চিলাপথাৰত তোলপাৰ লগাইছে । এগৰাকী পিতৃয়ে ঘৰত কোনো নথকাৰ সুযোগ লৈ নিজ কন্যাক ধৰ্ষণ কৰাৰ ঘটনা পোহৰলৈ অহাৰ পিচতে সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে ৷
যোৱা 12 ছেপ্টেম্বৰত পিতৃয়ে 13 বছৰীয়া কন্যাক পিষ্টল দেখুৱাই অসৎ অভিপ্ৰায় সিদ্ধি কৰে ৷ এই কথা কাৰোবাক ক’লে হত্যা কৰাৰো ভাবুকি দিয়ে পিতৃয়ে ৷ এই সমগ্ৰ ঘটনাৰ কথা জানিবলৈ পাৰি মাতৃয়ে প্ৰাণৰ মমতাত ভুক্তভোগী কন্যাগৰাকীক লগত লৈ গুৱাহাটীত আশ্ৰয় লয় ৷
ইয়াৰ পিচতে যোৱা 16 ছেপ্টেম্বৰত এজাহাৰ দিবলৈ কন্যাসহ মাতৃ উপস্থিত হয় দিছপুৰ থানাত । মাতৃৰ অভিযোগ অনুসৰি আৰক্ষীয়ে গোচৰ পঞ্জীয়ন কৰে ৷ এই নিকৃষ্ট ঘটনা সংঘটিত কৰা লোকজন চিলাপথাৰ বামগাঁও নিবাসী এজন প্ৰখ্যাত ব্যৱসায়ী ৷ শিলভঙা ক্ৰেচাৰ মেচিন, ফকলেণ্ড, এক্সকেভেটৰ, ডাম্পাৰ আদি অলেখ যান বাহন আৰু সা-সম্পত্তিৰ গৰাকী এইজন ব্যৱসায়ী । তেওঁৰ লগত 24 ঘন্টাই ৰাখে এটা অনুজ্ঞাপত্ৰ থকা পিষ্টল ৷
ইপিনে ঘটনাৰ 12 দিনৰ পিচতো অপৰাধীক আৰক্ষীয়ে গ্ৰেপ্তাৰ নকৰাৰ প্ৰতিবাদত দেওবাৰে চিলাপথাৰৰ মহিলা সমাজে নগৰত এক সমদল উলিয়ায়। হাতে হাতে প্লে-কাৰ্ড লৈ ধৰ্ষণকাৰীক গ্ৰেপ্তাৰ কৰক, অসম আৰক্ষী হায় হায়, মহিলাৰ সুৰক্ষা সুনিশ্চিত কৰক, নাবালিকাক সুৰক্ষা প্ৰদান কৰক, চিলাপথাৰ পুলিচ ঘোচখোৰ আদি বিভিন্ন শ্লোগানেৰে পৰিৱেশ উত্তাল কৰি তোলে প্ৰতিবাদকাৰীসকলে ।
লগে লগেই প্ৰতিবাদী সমদলক চিলাপথাৰ আৰক্ষীযে ঠেলি হেঁচি গতিয়াই বাহিৰ কৰি দিয়াৰ লগতে বেনাৰসমূহ কাঢ়ি লয় । ফলত আৰক্ষী আৰু প্ৰতিবাদী মহিলাৰ মাজত এক খণ্ড-যুদ্ধৰ সৃষ্টি হয় । এতিয়াও মুকলি আকাশৰ তলত ঘূৰি ফউৰা ধৰ্ষণকাৰী পিতৃ আৰু আৰক্ষীৰ মাজত মিতিৰালি আছে বুলি ৰাইজে সন্দেহ প্ৰকাশ কৰিছে।
ইফালে ধৰ্ষণকাৰী পিতৃৰ বিৰুদ্ধে দিছপুৰ থানাত আৰক্ষীয়ে ভাৰতীয় দণ্ড বিধি আইনৰ 376(2)(B)/354B/ ধাৰাৰ আৰু 8/4 OF POCSO ACT 2012 আইনৰ অধীনত 1812/2023 নম্বৰত গোচৰ পঞ্জীয়ন কৰিছে।
এতিয়া প্ৰশ্ন উত্থাপন হৈছে যে, সততে বেটী বছাও বেটী পঢ়াও শ্লোগান দিয়া বিজেপি চৰকাৰৰ দিনত পিতৃৰ যৌন উৎপীড়নৰ কামনাৰ বলি হোৱা কিশোৰীগৰাকীয়ে ন্যায় পাবনে ! আৰক্ষীয়ে ঘটনাৰ নিৰপেক্ষ তদন্ত কৰিব নে ?
লগতে পঢ়ক: Minor rape: কন্যাক ধৰ্ষণ কৰিলে পিতৃয়ে, প্ৰাণৰ মমতাত মাতৃ-কন্যাৰ পলায়ন
