জোনাই,২০ মে': জোনাই মহকুমাৰ মুৰ্কংচেলেক ৰে'ল ষ্টেচনৰ সমীপৰ লক্ষীনেপালী বস্তিত বৃহস্পতিবাৰে স্থানীয় ৰাইজে নিষিদ্ধ ড্ৰাগছসহ দুজন যুৱকক আটক কৰি আৰক্ষীৰ হাতত গতাই দিয়ে । ধৃত যুৱক দুজনৰ নাম পুতুল মাহাতো আৰু ফাইজুদিন আলী ।
ৰাইজৰ অভিযোগ অনুসৰি, যুৱক দুজনে দীৰ্ঘদিনৰ পৰা অঞ্চলটোত ড্ৰাগছ সৰবৰাহৰ লগত জড়িত হৈ আছিল । তদুপৰি ড্ৰাগছ ক্ৰয় কৰিবলৈ যুৱক দুজনৰ ঘৰলৈ প্ৰায়ে আহিছিল বহু অচিনাকি লোক ৷ দীৰ্ঘদিনৰ পৰা যুৱক দুজনৰ চলন-ফুৰণত স্থানীয় লোকে চকু ৰাখিছিল ৷ ইয়াৰ পৰিণতিতে বুধবাৰে দুয়োকে আটক কৰিবলৈ সক্ষম হয় গাঁৱবাসী ৷
উল্লেখযোগ্য যে, জোনাইত মাৰাত্মক ড্ৰাগছৰ ৰমৰমীয়া বেহা দিনক-দিনে বৃদ্ধি পাই আহিছে । নিষিদ্ধ ড্ৰাগছ সেৱন কৰি বহু যুৱকৰ জীৱন ধ্বংস হোৱাৰ লগতে ড্ৰাগছৰ অবাধ প্ৰচলনৰ ফলত সুস্থ, সামাজিক তথা শৈক্ষিক পৰিৱেশ বিনষ্ট হৈ পৰিছে । মহকুমাটোৰ বিভিন্ন ঠাইত নিষিদ্ধ ড্ৰাগছৰ ৰমৰমীয়া বেহাই সচেতন অভিভাৱক-ৰাইজক গভীৰভাৱে চিন্তিত কৰি তুলিছে ।
লগতে পঢ়ক: বটদ্ৰৱা আৰক্ষীৰ জালত অবৈধ কয়লাভৰ্তি ট্ৰাক
