ধেমাজি, ২৯ নৱেম্বৰ: চৰকাৰৰ শিক্ষাবিভাগে উন্নতিৰ জয়ঢোল বজোৱাৰ সময়তে ধেমাজিৰ শিমলুগুৰি কাঁহচৰা প্ৰাথমিক বিদ্যালয়ত পৰিলক্ষিত হৈছে এক ব্যতিক্ৰমী দৃশ্য ৷ বৰ্তমান সময়ত শুনিবলৈ আচহুৱা যেন লাগিলেও জিলাখনৰ এখন বিদ্যালয়ত শিক্ষাৰ্থীয়ে গছৰ তলত শিক্ষাগ্ৰহণ কৰিবলগীয়া হৈছে ৷ উল্লেখ্য যে, বিদ্যালয়খনত শ্ৰেণীকোঠা তথা ডেক্স-বেঞ্চৰ অভাৱৰ বাবে অধিকাংশ ছাত্র-ছাত্ৰীয়ে সম্প্ৰতি এইদৰে শিক্ষাগ্ৰহণ কৰি আছে । উক্ত বিদ্যালয়খন ধেমাজি শিক্ষাখণ্ডৰ অন্তৰ্গত অসম-অৰুণাচল সীমান্তৰ সমীপৱৰ্তী বিষ্ণুপুৰ বনগাঁৱত অৱস্থিত ৷ পূৰ্বে 1969 চনত টেকজুৰিত স্থাপিত বিদ্যালয়খন প্ৰলয়ংকৰী জীয়াঢলৰ বানত জাহ যোৱাৰ পিছত, 2011 চনত বনগাঁৱত স্থাপন কৰা হয় । গছৰ তলত শিক্ষাপ্ৰদানৰ ক্ষেত্ৰত প্ৰধান শিক্ষক পংকজ কলিতাৰ শ্ৰম আৰু ত্যাগ শলাগিবলগীয়া ৷ উক্ত ঘটনা সন্দৰ্ভত প্ৰধান শিক্ষক কলিতাই জানিবলৈ দিয়া মতে, বিদ্যালয়খনত আছে ডেৰশৰো অধিক ছাত্ৰ-ছাত্ৰীৰ বিপৰীতে দুজন শিক্ষক ।
ইপিনে স্থানীয় ৰাইজৰ সহযোগত প্ৰধান শিক্ষক গৰাকীয়ে শৈক্ষিক পৰিৱেশ গঢ় দিবলৈ প্ৰয়াস কৰা পৰিলক্ষিত হৈছে । সম্প্ৰতি ভগ্নপ্ৰায় শ্ৰেণীকোঠালৈ সোমাই আহে পোহৰ । বিদ্যালয়খনত নাই চৰকাৰী কোনো আচবাব । বিদ্যালয় কৰ্তৃপক্ষই ইয়াৰ আন্তগাঁথনি আৰু শিক্ষকৰ অভাৱ সন্দৰ্ভত বাৰম্বাৰ জিলাৰ শিক্ষাবিভাগক অৱগত কৰি অহা সত্বেও আজিকোপতি কোনো ব্যৱস্থা কৰা নাই বুলি মন্তব্য কৰিছে প্ৰধান শিক্ষকগৰাকীয়ে । স্মৰ্তব্য যে, যি সময়ত ছাত্র-ছাত্ৰীৰ অভাৱত চৰকাৰী বিদ্যালয়ৰ অপমৃত্যু ঘটিছে, তেনে সময়তে প্ৰধান শিক্ষকগৰাকীৰ বিদ্যালয়খনক জীয়াই ৰখাৰ প্ৰয়াস প্ৰশংসনীয় ৷
লগতে চাওক:গুৱাহাটীত দেশৰ সৰ্ববৃহৎ যুৱ ক্ৰীড়া সমাৰোহ ’’ খেল’ ইণ্ডিয়া 2020’’
