জোনাই, 23 আগষ্ট : শনিবাৰে পুৱতি নিশা জোনাইৰ সোণোৱাল কাতনিত চিয়াঙৰ বাঢ়নি পানীয়ে ছিঙিলে মথাউৰি ৷ শান্তিপুৰ, মালভোগ, ৰাভা কাতনি, সোণোৱাল কাতনি, তাৰি মাজগাঁও আদিকে ধৰি ১০ খনৰো অধিক গাঁও এতিয়া পানীৰ কবলত ৷ সম্প্ৰতি পানীত বুৰ গৈছে শ শ পৰিয়ালৰ ঘৰবাৰীৰ লগতে খেতিপথাৰ ৷ সম্পূৰ্ণ জলমগ্ন অঞ্চলসমূহৰ ৰাইজৰ মাজত সৃষ্টি হৈছে হাহাকাৰ পৰিস্থিতি ৷
উল্লেখ্য যে, জোনাই অঞ্চলত শেহতীয়াকৈ MGNREGA আঁচনিৰ ধন ব্যয় কৰি নিৰ্মাণ কৰা হৈছিল মথাউৰি ৷ লক্ষাধিক টকা ব্যয় সাপেক্ষে নিৰ্মাণ কৰা মথাউৰিটোৱে ভেটি দি ৰাখিব নোৱাৰিলে বাৰিষাৰ বলীয়া বানক ৷ ফলস্বৰূপে জলমগ্ন হৈ পৰে প্ৰায় কুৰিখনৰো অধিক গাঁও ৷
বিগত কিছুদিনৰ পৰা নেৰানেপেৰাকৈ দি থকা বৰষুণৰ ফলত ক্ৰমাৎ বাঢ়িছে চিয়াং নদীৰ জলপৃষ্ঠ ৷
চিয়াঙৰ বাঢ়নী পানীয়ে কবু চাপৰিলৈও নমাই আনিছে অশনি সংকেত ৷ জলমগ্ন হৈ পৰিছে কবু চাপৰিৰ ১ আৰু ২ নং ৱাৰ্ডৰ সকলো ঘৰ-বাৰী, কৃষি ভূমি ৷ এই বানে কেৱল সাধাৰণ লোকৰ বাবেই নহয়, অশনি সংকেত কঢ়িয়াই আনিছে পশুধনৰ প্ৰতিও ৷ চিয়াং নদীৰ বাঢ়নী পানীয়ে বিভিন্ন চাপৰিসমূহত থকা গৰু-ম’হৰ খুটিবোৰ বুৰাই পেলোৱাত হাহাকাৰ অৱস্থাৰ সৃষ্টি হৈছে গো-পালকসকলৰ মাজত ।
লগতে পঢ়ক: ফুচকা বিক্ৰেতাৰ জঘন্য কাণ্ড ছ'চিয়েল মিডিয়াত ভাইৰেল : অৱশেষত গ্ৰেপ্তাৰ
