লাঠিৰে মৰিয়াই মৰিয়াই হত্যা এজনক

শনিবাৰে পুৱাৰ ভাগত জোনাইৰ বেৰাচাপৰিৰ নলনী পামত নৃশংস হত্যাকাণ্ড ৷ গৰু পোৱালি বাৰীত সোমোৱাক লৈ কাজিয়াত লিপ্ত হৈ এজনে প্ৰাণ ল’লে আন এজনৰ ৷ ঘটনা সন্দৰ্ভত হত্যাকাৰীক আটক কৰি তদন্ত অব্যাহত ৰাখিছে জোনাই আৰক্ষীয়ে ৷

জোনাই,29 নৱেম্বৰ : জোনাইৰ বেৰাচাপৰিৰ নলনী পামত শনিবাৰে সংঘটিত হৈছে এক নৃশংস হত্যাকাণ্ড ৷ জানিব পৰা মতে, পুৱা 6 বজাত নলনী পাম নিৱাসী নৰেন বৰা (45)ই টকাৰ লেনদেন সম্পৰ্কীয় কথাত বিনোদ যাদৱ (55) নামৰ লোকজনৰ সৈতে তৰ্কত লিপ্ত হয় ৷

কাজিয়াৰ মাজতে নৰেন বৰাই বিনোদ যাদৱক কাঠৰ ধান খুন্দা লাঠিৰে মৰিয়াই মৰিয়াই হত্যা কৰে ৷ হত্যাকাণ্ডটো সংঘটিত কৰিয়েই নৰেন বৰাই আত্মসমৰ্পন কৰিবলৈ চাইকেলেৰে জোনাই থানালৈ গৈ থকা অৱস্থাতে জোনাই আৰক্ষীয়ে আটক কৰে হত্য়াকাৰী নৰেনক ৷

ইফালে মৃতকৰ পৰিয়ালে সদৰি কৰা মতে, গৰু পোৱালি বাৰীত সোমোৱাক লৈ দুয়ো কাজিয়াত লিপ্ত হয় আৰু ধান খুন্দা লাঠিৰে বিনোদক মাৰি পৰিয়ালৰ আন এগৰাকী মহিলাকো মূৰত আক্ৰমণ কৰে নৰেনে ৷ মহিলা গৰাকীৰ মূৰত 7 টা চিলাই পৰা বুলি জানিব পৰা গৈছে ৷ জোনাই আৰক্ষীয়ে হত্যাকাৰী নৰেনক আটক কৰি ভাৰতীয় দণ্ডবিধি আইনৰ 325/302 ধাৰাৰ অধীনত 137/2020 নং ধাৰাত গোচৰ ৰুজু কৰি ঘটনা সন্দৰ্ভত তদন্ত অব্যাহত ৰাখিছে ৷

লগতে পঢ়ক : টকাৰ লোভত পৰি সৰ্বস্ৰান্ত হেৰুৱালে এগৰাকী মহিলাই