ধেমাজি, 21 এপ্ৰিলঃ ৰাজ্যত বিহুৰ আনন্দ-উচাহৰ সময়তে শনিবাৰে নিশা এজাক ধুমুহা বৰষুণে তাণ্ডৱ চলালে ধেমাজি জিলাত ৷ জিলাখনৰ চমৰাজান আৰু পশ্চিম ধেমাজিত শনিবাৰে নিশাৰ ভাগত বিস্তৰ ক্ষতিসাধন কৰে বিধ্বংসী ধুমুহা জাকে ৷
পুৱতি নিশাৰ ধুমুহাত বিধ্বস্ত ধেমাজি
পুৱতি নিশা অহা ধুমুহাই সমগ্ৰ অঞ্চলটোত বিস্তৰ ক্ষতিসাধন কৰে ৷ বিশেষকৈ চমৰাজান আৰু পশ্চিম ধেমাজিত বহুসংখ্যক গছ-গছনি ভাঙি পেলোৱাৰ লগতে, বহুকেইটা পৰিয়ালৰ বাসগৃহৰ ক্ষতিসাধন হয় ৷ ধুমুহাৰ ফলত চমৰাজান 2নং টেঙাপুৰৰ পৰমা চুতীয়া নামৰ ব্যক্তিগৰাকীৰ বাসগৃহটো সম্পূৰ্ণৰূপে বিধ্বস্ত হোৱাৰ লগতে তেওঁৰ মাতৃ পুতলী চুতীয়া গুৰুতৰভাৱে আঘাতপ্ৰাপ্ত হয় ৷ আঘাতপ্ৰাপ্ত মহিলাগৰাকীক স্থানীয় চিকিৎসালয়ত ভৰ্তি কৰোৱা হৈছে ৷ ইয়াৰ উপৰিও ধুমুহাৰ ফলত ৰতুৱা অঞ্চলটো প্ৰায় 30টাৰো অধিক পৰিয়ালৰ বাসগৃহ ক্ষতিগ্ৰস্ত হয় ৷
