ধেমাজি, 22 জুলাই : শাওণমহীয়া ভৰুণ পথাৰ ৷ ৰোৱনীয়ে কোঁচনি কোঁচাই খিলখিলনি তুলি সজীৱ কৰি তুলিছে শাওণমহীয়া পথাৰ ৷ কঁপালৰ ঘাম মাটিত পেলাই নাঙলৰ সীৰলুত সেউজীয়াৰ সপোন ৰচিছে চহা খেতিয়কে ৷
শাওণ মানেই যেন ব্যস্ততাৰে ভৰা পথাৰ ৷ প্ৰতিজন চহা অসমীয়াৰে সীমাহীন ব্যস্ততা এতিয়া শাওণৰ পথাৰত ৷ শাওণ মাহৰ কিনকিনীয়া বৰষুণ অথবা গোমা আকাশৰ তলত সিক্ত দেহাৰে কৃষক ৰোৱনীয়ে পথাৰত সিঁচি দিয়ে সপোনবোৰ ৷ জেঠ-আহাৰত চহ কৰি সাজু কৰি লোৱা পথাৰসমূহ শাওণৰ পহিলা সপ্তাহত হৈ পৰে ভৰপক ৷ কাৰোৱেই যেন মূৰ তুলি চাবলৈ আহৰি নাই ৷
ৰাজ্যৰ ভিন্ন প্ৰান্তৰ লগতে ধেমাজি নগৰৰ সমীপৰ ঐতিহাসিক তেলিজান দ পথাৰত দৃষ্টি নন্দন দৃশ্য ৷ শাওণৰ পহিলা সপ্তাহৰ ভিতৰত নিজৰ খেতি ডৰা সেউজীয়া কৰি তোলাৰ বাবে আপ্ৰাণ প্ৰয়াস কৃষক-ৰোৱনীৰ ৷
বিশেষকৈ তেলিজান দ পথাৰত বোকা পানী গভীৰতা হোৱা বাবেই বোকাৰ সলনি আলি দিয়ে পথাৰত সৃষ্ট আৱৰ্জনাই ৷ এই পথাৰতে ধেমাজি নগৰৰ উপকণ্ঠ অঞ্চল ক্ৰমে ভৰালীচুক, নলনিপাম তেলিজান, ভেহপৰা আদি গাঁৱৰ কৃষক ৰাইজে খেতি কৰি প্ৰাপ্তিৰ সপোন ৰচে ৷ সুবিশাল শাওণৰ পথাৰত ৰোৱনীৰ লাৱণী হাতেৰে গুজি দিছে হেঁপাহৰ কঠীয়ামুঠি ৷
এসময়ত বাৰিষা তেলিজান পথাৰত বিভিন্ন মাছ পুথি আৰু কলমৌ লেহেতী জাতীয় বন শাকেৰে উভৈনদী হৈ আছিল ৷ কৃষকে পথাৰত হাড়ভঙা পৰিশ্ৰম কৰা অন্তত ঘৰত গৈ পথাৰৰ মাছ আৰু কলমৌ শাকেৰে পৰম তৃপ্তিৰে খাইছিল ভাত সাঁজ ৷ পিছে পৰিতাপৰ বিষয় যে বৰ্তমান পথাৰত গৰুহালৰ বিপৰীতে টেক্টৰ প্ৰয়োগৰ পিছৰে পৰা মাছ পুথি শাক বন নোহোৱা হ’ল পথাৰখনত ৷ আনহাতে ক্ৰমান্বয়ে সংকুচিত হৈ আহিছে হাজাৰ হাজাৰ কৃষকৰ সপোন লুকাই থকা এই সুবিশাল পথাৰখন ৷
লগতে পঢ়ক: Assam flood Situation : ৰঙাপৰাত জৰাসৰ নৈৰ প্ৰৱল গৰাখহনীয়া
